Vajza ndërroi jetë pas operacionit/ Spitali Amerikan sqaron si ndodhi ngjarja

2024-01-31 15:40:00, Aktualitet CNA

Vajza ndërroi jetë pas operacionit/ Spitali Amerikan sqaron si ndodhi

Spitali Amerikan ka reaguar pas denoncimit në media për humbjen e jetës së një vajze me tumor, e cila i ishte nënshtruar një ndërhyrje për dobësim.

Spitali Amerikan deklaron se e reja e kreu ndërhyrjen kirurgjikale në 29 janar sipas protokollit mjekësor dhe gjithçka përfundoi me sukses.

Në deklaratë thuhet se një ditë pas operacionit, gjendja shëndetësore e vajzës u përkeqësua menjëherë.

Sipas spitalit, pacientja pësoi komplikacion postoperator mjaft të rëndë dhe me shkallë të lartë mortaliteti, i cili është pjesë e riskut të çdo ndërhyrjeje kirurgjikale, dhe si pasojë ndërroi jetë.

“Nisur nga vëmendja dhe interesi publik, Spitali Amerikan, me pikëllim dhe dhimbje të thellë, ndien detyrim moral dhe profesional të japë informacion të saktë ndaj rastit të pacientes I.H për ndarjen e saj papritur nga jeta, më datë 30 Janar.

Pacientja I. H. në datë 29 Janar ka kryer ndërhyrje kirurgjikale pranë Spitalit Amerikan, ndërhyrje rutinë e kryer me çdo detaj sipas protokollit mjekësor dhe profesional. Operacioni është kryer konform çdo standarti mjekësor, pasi janë kryer të gjitha kontrollet, konsentet dhe analizat pre operatore të nevojshme.

Operacioni ka përfunduar me sukses dhe pa asnjë problem.

Në datën 30 Janar pacientja pësoi një përkeqësim të menjëhershëm nga një komplikacion post operator mjaft i rëndë dhe me shkallë të lartë mortaliteti, i cili është pjesë e riskut të çdo ndërhyrjeje kirurgjikale. Pavarësisht përpjekjeve maksimale nga mjekët dhe stafi më i specializuar i Spitalit për gjatë disa orësh për ta risjellë pacienten në gjendje normale, fatkeqësisht pacientja humbi jetën.

Spitali Amerikan, si në çdo rast, është në dispozicion për të bashkëpunuar me institucionet ligjzbatuese për sqarimin e kësaj ngjarje të dhimbshme për të gjithë, duke kërkuar shmangien e çdo deformimi apo dhe keqinformimi të publikut nga persona që nuk kanë informacion mbi situatën reale”, theksohet në deklaratë./ CNA

Vajza ndërroi jetë pas operacionit/ Spitali Amerikan sqaron si ndodhi