U gjet e vrarë 22 vite më parë/ Zbardhet letra e Erjeta Avdylit për bashkëshortin: Kam frikë…

2022-12-07 23:09:00, Aktualitet CNA

U gjet e vrarë 22 vite më parë/ Zbardhet letra e Erjeta Avdylit

Dritan dhe Erjeta Avdyli

Erjeta Avdyli u zhduk në 30 mars të vitit 2000 dhe u gjet e vrarë në 13 maj të 2000-ës në Romanat të Durrësit, por ngjarja e saj ka mbetur e pazbardhur.

Familjarët e Avdylit kanë ngritur akuzat se autori i vrasjes së saj mund të jetë Dritan Avdyli, ish-drejtues i lartë policie, i cili u shpall i pafajshëm.

Kjo ngjarje është sjellë në kujtesë në emisionin “Në Shënjestër”, ku është publikuar mbrëmjen e sotme letra që viktima i dërgonte bashkëshortit të saj 2 vite para se të vritej.

E paguximshme për tu përballur me Dritan Avdylin, ajo i shkruante një letër, ku tregonte frikën që kishte nga bashkëshorti dhe vuajtjet që po kalonte nga ai.

Letra e Erjeta Avdylit drejtuar bashkëshortit, më 30 maj 1998:

Dritan!

Në pamundësi për të folur ballë për ballë me ty, sepse kam frikë nga fjalët e zakonshme ‘mos më çaj kokën’, ose ‘ik, moj qelbësirë’, po të shkruaj atë që ndiej në letër.

Jam shumë e fyer dhe e vrarë shpirtërisht. Nuk mund të duroj të më trajtosh sikur unë nuk ekzistoj, të hysh e të dalësh në shtëpi pa më përshëndetur, të mos më flasësh me gojë dhe të mos më prekësh me dorë për ditë të tëra… Për ty unë nuk vlej asgjë. Këtë më thotë sjellja jote. Kurse babai yt më fyen me fjalë që unë s’mund t’i them, por po t’i shkruaj. Sa herë që më merr në telefon ndonjë shoqe ose ime motër dhe unë nuk jam në shtëpi, ai i përgjigjet ‘kushedi se nga bredh’, duke e ditur ndërkohë se ku jam unë, sepse nuk kam dalë asnjëherë nga shtëpia pa i përshëndetur dhe pa u thënë adresën se ku po shkoj. Kurse mua më kthehet edhe më thotë: ‘U këpute në b…. ti duke punuar. Nga ti po jetojmë, nuk e shikon!’ etj.

Hyj në shtëpi, përshëndes dhe nuk marr asnjë përgjigje nga ai. Këto më vrasin edhe më shumë. Unë më duket se po punoj njësoj si ti dhe po kontribuoj njëlloj si ti për familjen.

Nuk e meritoj të më sillesh në këtë mënyrë, Dritan, sidomos ti. Unë e ndiej se duhet të largohem për disa kohë te prindërit e mi.

Në qoftë se ti mendon se me të vërtetë unë nuk vlej asgjë për ty dhe të jam mërzitur, mos hajde të më marrësh.

Në të kundërt, të pres me gjithë shpirt dhe po ta them edhe njëherë, siç ta kam thënë me dhjetra herë, të dua shumë, nuk dua të shkatërroj familjen time, por të më trajtosh si një leckë dhe të më thuash qelbësirë e mos më çaj kokën, nuk duroj dot.

Të mos diskutosh asnjëherë me gruan tënde, të mos marrësh asnjëherë mendim, kjo nuk më duket normale. Ose të më thuash të paktën një herë me çiltërsi, e jo ta bluash nga brenda: ‘Këtu ke gabuar, këtu më ke fyer, mos e bëj më’ etj.

Mirë mbetsh Dritan!/ B.A. – CNA.al