Si po thellohet afera e inceneratorëve/ Abuzimi dhjetëra miliona euro që po vjedh shqiptarët

2023-01-18 17:27:00, Aktualitet CNA

Si po thellohet afera e inceneratorëve/ Abuzimi dhjetëra miliona euro

Inceneratori i Tiranës

Eksperti i ekonomisë, Klodian Muço, ka treguar sot se si po thellohet afera e inceneratorëve, e cila sipas tij nisi që nga kërkesa për leje pa u aktivizuar ende kompania.

Muço tha në një intervistë me Armela Ferkon se afera vazhdoi me evazion fiskal dhe me faturat dhjetëra miliona euro, për të arritur te faktet e reja të publikuara dje, që janë rritja e kostove për mbetjet dhe moskryerja e proceseve të incenerimit.

Ai theksoi se për këto pagesa nuk po bëhet asgjë, ndërsa ngriti pyetjen se përse po shpërdorohen lekët e taksapaguesve shqiptarë.

"Inceneratorët kanë nisur me afera që në fillim, u krijuan, domethënë u bë një kërkesë për leje, ndërkohë nuk ishte aktivizuar kompania. Dolën me dhjetëra miliona euro që po bënin evazion fiskal që nga një anë shisnin inerte dhe nga ana tjetër rimbursonin faturat me fruta, sheqer apo e të tjera.

Në thelb çfarë doli e re?!

Doli se edhe pse po paguhen dhjetëra milona euro dhe po të shikojmë buxhetin e bashkisë Tiranë, shohim se kanë një rritje të kostove për mbetjet dhe nga ana tjetër shikojmë se te inceneratori i Tiranës nuk bëhet incenerim, por thjesht kapsulim dhe kjo u konfirmua dje me fakt se çfarë ndodhte realisht. Pra, nga njëra anë kemi pagesa prej dhjetëra miliona eurosh por nga ana tjetër nuk bëhet asgjë dhe lind natyrshëm pyetja:

Pse paguajnë këto para nga qytetarët dhe pse shpërdorohen kështu lekët e taksapaguesve shqiptarë? Sot po ndiqja se si policia bashkiake vajti gjeti një nga nënat e vjetra dhe i sekuestroi preshët vetëm se shfrytëzonte ambientet publike dhe si ka mundësi që një abuzim kaq i madh që ka vajtur në dhjetëra miliona euro, mbi 180, tani nuk ju bie në mendje?", nënvizoi eksperti i ekonomisë./ B.A. - CNA.al