Mesazhi i fortë i ambasadës së SHBA-së për drejtësinë: Momenti të tregoni guxim

2024-02-16 10:21:00, Aktualitet CNA

Mesazhi i fortë i ambasadës së SHBA-së për

Ambasada amerikane ka dhënë sot një mesazh të fortë për institucionet e drejtësisë shqiptare, disa orë pas vizitës së Sekretarit Amerikan, Antony Blinken në Tiranë.

Në një postim në rrjetet sociale, ambasada amerikane ka publikuar foto të Blinken me përfaqësuesit e drejtësisë shqiptare, mes të cilëve edhe kreu i SPAK, Altin Dumani, dhe thekson se tani është momenti që institucionet e reja të drejtësisë të veprojnë me guxim ndaj pandëshkueshmërisë.

Ambasada nënvizon se institucionet e reja të drejtësisë duhet të nxisin besimin e publikut në sundimin e ligjit dhe për këtë gjë kanë mbështetjen e SHBA-së.

Ky mesazh i amerikanëve vjen në një moment kur SPAK dhe organet e drejtësisë kanë nën hetim shumë dosje të aferave korruptive në vend, në të cilën kanë rezultuar si të përfshirë ish-ministra, zyrtarë të lartë, apo edhe njerëz me pushtet në vend.

Në duart e SPAK, tashmë është ende nën hetim afera e inceneratorëve, disa PPP, koncesione si ai i sterilizimit dhe "Check up", për të cilat priten goditje të radhës dhe mund të ketë të tjerë zyrtarë nën pranga.

Theksojmë këto, që për këto hetime ka pasur një mbështje shumë të madhe nga ndërkombëtarët për Altin Dumanin, kreu e SPAK.

Edhe reagimi i sotëm, i ambasadës përcjell mesazhin që të vijohet me hetimet për dosjet e "nxehta" dhe SPAK të kapë në rrjetën e tij "peshqit e mëdhenj" të përfshirë në korrupsion.

"Sekretari i Shtetit Antony Blinken përsëriti angazhimin e qëndrueshëm të Shteteve të Bashkuara për reformën në drejtësi në Shqipëri gjatë një takimi me krerët e drejtësisë dje. Megjithëse reforma nuk është e shpejtë, e përsosur, apo e lehtë, ky është momenti që institucionet e reja të drejtësisë të veprojnë me guxim ndaj pandëshkueshmërisë dhe të nxisin besimin e publikut në sundimin e ligjit. Këto sfida janë të mëdha, por Shtetet e Bashkuara qëndrojnë fort pas këtyre institucioneve dhe do të mbetemi të palëkundura në mbështetjen tonë", thuhet në reagimin e ambasadës amerikane./CNA