Yield-i i obligacioneve 15-vjeçare zbret në nivelin më të ulët në 18 muaj

26 Gusht 2024, 10:25, Ekonomi CNA

Yield-i i obligacioneve 15-vjeçare zbret në nivelin më të

Yield-i i obligacioneve 15-vjeçare pësoi një rënie të mëtejshme në ankandin e kësaj jave.

Sipas informacionit nga Banka e Shqipërisë, yield-i uniform i pranuar në rihapjen e ankandit të obligacioneve 15-vjeçare zbriti në 6.98%, nga 7.45% në ankandin e mëparshëm të muajit maj dhe nga 7.94% që kishte qenë në ankandin fillestar të të njëjtit emetim, që u zhvillua në muajin shkurt.

Nga 2 miliardë lekë që kishte shuma e shpallur nga Ministria e Financave, shuma e paraqitur e kërkesave në ankand arriti në më shumë se tre miliardë lekë.

Ministria e Financave vendosi të rrisë shumën e emetimit, me rreth 9% (nga 15% që është limiti i lejuar prej rregullores së ankandeve) në 2.18 miliardë lekë. Në rast të mosrritjes së shumës së pranuar të ofertave, yield-i do të kishte qenë edhe më i ulët.

Rregullorja e ankandeve të obligacioneve parashikon që yield-i për të gjitha kërkesat e pranuara të jetë uniform me yield-in e kërkesës më të lartë të pranuar.

Yield-i i obligacioneve 15-vjeçare ka zbritur tashmë në nivelin më të ulët që prej shkurtit të vitit 2023.

Rënia e mëtejshme e yield-it të obligacioneve 15-vjeçare konfirmon një tendencë në rënie të yield-eve të titujve qeveritarë gjatë këtij viti. Kjo rënie u nxit më tej nga ulja e normës bazë të interesit nga Banka e Shqipërisë në fillim të muajit korrik.

Me rënien e inflacionit pranë nivelit prej 2%, tashmë shqetësimet inflacioniste janë zbutur ndjeshëm. Ndryshe nga sa pritej deri në fund të vitit 2023, rritja e mëtejshme e normave të interesit për lekun u shmang.

Tashmë, për Bankën e Shqipërisë, ashtu si për Bankën Qendrore Europiane, dilema është nëse ulja e normave të interesit duhet të vazhdojë më tej gjatë këtij viti.

Një mjedis i tillë, i gërshetuar me prime të ulëta rreziku dhe me një gjendje të mirë likuiditeti në tregun financiar shqiptar, po sjell ulje të yield-eve të borxhit të qeverisë.

Megjithatë, obligacionet afatgjata të qeverisë shqiptare sidoqoftë vazhdojnë të ofrojnë kthime mjaft të kënaqshme në raport me rrezikun e investimit.

Madje, tregu i brendshëm i letrave të borxhit të qeverisë shqiptare po tërheq edhe investitorë nga jashtë. Sipas Bankës së Shqipërisë, portofoli i investitorëve jorezidentë në fund të 6-mujorit 2024 arriti vlerën e rreth 6 miliardë lekëve.

Pjesëmarrja e investitorëve jorezidentë gjatë tremujorit të dytë 2024 mbuloi rreth 18% të shtesës së borxhit të qeverisë.

Burime nga sektori financiar shprehen se në vitet e fundit investitorët e huaj po shfaqin një interes në rritje për tregun e titujve qeveritarë në Shqipëri.

Këta tituj kthime mjaft tërheqëse, në raport me titujt e vendeve më të zhvilluara, ndaj po shihen si një alternativë për të diversifikuar portofolet e investimit.

Një interes i lartë i investitorëve për titujt e qeverisë shqiptare është vërejtur edhe në emetimet e eurobondit, gjatë viteve të fundit.

Ky interes, tashmë, duket se po shtrihet edhe në titujt e emetuar në tregun e brendshëm, në monedhën kombëtare lekë./Monitor