Yield-i i obligacioneve 15-vjeçare bie në 7.45%

16 Maj 2024, 09:13, Ekonomi CNA

Yield-i i obligacioneve 15-vjeçare pësoi rënie të ndjeshme në ankandin e kësaj jave.

Sipas informacionit nga Banka e Shqipërisë, yield-i uniform i pranuar në rihapjen e ankandit zbriti në 7.45%, nga 7.94% që kishte qenë në ankandin fillestar të të njëjtit emetim, që u zhvillua në muajin shkurt.

Nga 1.5 miliardë lekë që kishte shuma e shpallur nga Ministria e Financave, shuma e paraqitur e kërkesave në ankand arriti në pothuajse 2.6 miliardë lekë. Ministria e Financave vendosi të rrisë shumën e emetimit me maksimumin e lejuar prej 15%, duke e çuar në 1.725 miliardë lekë.

Në rast të mosrritjes së shumës së pranuar të ofertave, yield-i do të kishte qenë edhe më i ulët. Rregullorja e ankandeve të obligacioneve parashikon që yield-i për të gjitha kërkesat e pranuara të jetë uniform me yield-in e kërkesës më të lartë të pranuar.

Obligacionet afatgjata të qeverisë shqiptare sidoqoftë vazhdojnë të ofrojnë kthime mjaft të kënaqshme në raport me rrezikun e investimit. Shifrat e Autoritetit të Mbikëqyrjes Financiare treguan se për tremujorin I 2024 vlera e blerjeve të obligacioneve në tregun primar nga individët zbriti në më pak se 2.5 miliardë lekë, në rënie me 31.1% krahasuar me të njëjtën periudhë të vitit të kaluar.

Yield-i i obligacioneve 15-vjeçare bie në 7.45%

Ankandi i obligacioneve 15-vjeçare, mes të tjerave, konfirmon një zhvendosje në rënie të pritshmërive për normat e interesit. Në muajt e parë të këtij viti, inflacioni ka rënë me ritme të shpejtë dhe në muajin prill preku nivelin 2.1%, më i ulët në afërsisht tri vjet.

Banka e Shqipërisë në mbledhjen e këtij muaji e mbajti përsëri të pandryshuar normën bazë në 3.25% dhe në kushtet aktuale vështirë se mund të bëhet më fjalë për rritje të mëtejshme të normave. Megjithatë, Guvernatori Sejko pas mbledhjes së fundit të Këshillit Mbikëqyrës dha disa sinjale kujdesi, duke u shprehur se rënia e shpejtë e inflacionit po vjen si pasojë e faktorëve të ofertës së jashtme dhe kursit të këmbimit.

Banka e Shqipërisë pret që kjo rënie të jetë afatshkurtër, duke nënkuptuar se inflacioni mund t’i kthehet rritjes në muajt e ardhshëm. Shqetësimet lidhen kryesisht me presionet ende të larta inflacioniste që gjeneron ekonomia e brendshme, të lidhura sidomos me rritjen e pagave dhe me nevojën e lartë për forcë pune në sektorët e shërbimeve.

Sidoqoftë, tashmë duket se pritshmëritë e tregut financiar në afatin e mesëm duket se po zhvendosen drejt uljes së normave të interesit, sidomos duke ndjekur edhe skenarët e pritshëm në Eurozonë. Analistët presin që, në mungesë të goditjeve të papritura inflacioniste, Banka Qendrore Europiane të fillojë uljen e normave të interesit qysh muajin e ardhshëm. Një lëvizje e ngjashme pritet edhe nga Banka e Anglisë./ Monitor.al