E fundit!

21:25 Aktualitet

"Përgjegjësit u dënuan"/ Blendi Klosi: Rrethimi në Zvërnec është hequr

Sekretari i Përgjithshëm i PS-së, Blendi Klosi, ka bërë me...

Investimet e individëve në bono dhe obligacione ranë përsëri në tremujorin e parë 2024

13 Maj 2024, 10:06, Ekonomi CNA

Investimet e individëve në bono dhe obligacione ranë

Investimet e individëve në bonot dhe obligacionet e qeverisë shqiptare pësuan rënie në tremujorin e parë të këtij viti.

Të dhënat e Autoritetit të Mbikëqyrjes Financiare (AMF) tregojnë se blerjet e individëve në tregun primar të bonove dhe obligacioneve zbritën në 12.1 miliardë lekë, në rënie me 19.8% krahasuar me një vit më parë.

Rënia ishte edhe më e lartë e shprehur në numër transaksionesh, që u tkurrën në 4409, 25.2% më pak krahasuar me tremujorin e parë të vitit të kaluar.

Sipas llojit të instrumenteve financiare, rënia më e madhe u shënua në tregun e obligacioneve.

Shifrat e AMF-së tregojnë se vlera e blerjeve të obligacioneve në tregun primar zbriti në më pak se 2.5 miliardë lekë, në rënie me 31.1% krahasuar me të njëjtën periudhë të vitit të kaluar. Ndërkohë, investimi në bono thesari ra në 9.65 miliardë lekë, 16.3% më pak krahasuar me tremujorin e parë të vitit 2023.

Investimi në instrumentet afatshkurtra ngelet dominues mes individëve, me pothuajse 80% të vlerës totale të investuar gjatë periudhës.

Të dhënat e mësipërme u referohen transaksioneve të kryera nëpërmjet ndërmjetësve financiarë të licencuar nga AMF, kryesisht bankave tregtare. Investimi në bono thesari mund të kryhet edhe nëpërmjet sporteleve të posaçme të Bankës së Shqipërisë.

Investimet e individëve në bono dhe obligacione ranë

Tendenca rënëse e investimeve të individëve në bono dhe obligacione nisi qysh vitin e kaluar. Sipas AMF-së, për vitin 2023 blerjet e individëve në tregun primar të bonove dhe obligacioneve ranë në 37.5 miliardë lekë, në rënie me 24.5% krahasuar me vitin 2022.

Zbehja e interesit të individëve për të investuar në bono dhe obligacione duket e lidhur me tendencën rënëse të yield-eve të këtyre instrumenteve. Në vitin 2022, rritja e fortë e yield-eve të bonove dhe obligacioneve solli një interes të shtuar nga individët për të investuar në këto instrumente. Një pjesë e depozituesve madje preferuan t’i tërheqin paratë e mbajtura në depozita bankare ose fonde investimi dhe ti investojnë në bono edhe obligacione, në kërkim të kthimeve më të larta.

Ndërkohë, vitin e kaluar ritmi i rritjes së normave të interesit nga Banka e Shqipërisë u ngadalësua ndjeshëm. Kjo bëri që tregu i titujve të qeverisë të qetësohej dhe yield-et pësuan një rënie të ndjeshme në gjysmën e parë të vitit 2023, që u stabilizua më tej gjatë gjysmës së dytë dhe tremujorit të parë të këtij viti.

Sipas shoqërive komisionere, tregu i pjesëmarrjes së individëve në ankandet e titujve qeveritarë vazhdon të dominohet nga Raiffeisen Bank, me pothuajse 58% të shumës totale të investuar nga individët, e ndjekur nga Banka Kombëtare Tregtare me 19% të totalit. Aktualisht, për këtë shërbim zhvillojnë aktivitet dhjetë institucione të licencuara financiare, nga të cilat nëntë janë banka tregtare./ Monitor.al