Banka e Shqipërisë miraton strategjinë afatmesme të zhvillimit dhe buxhetin për vitin 2025

20 Nëntor 2024, 20:12, Ekonomi CNA

Banka e Shqipërisë

Këshilli Mbikëqyrës i Bankës së Shqipërisë miratoi në mbledhjen e sotme Strategjinë Afatmesme të Zhvillimit të institucionit për periudhën 2025-2027.

Strategjia Afatmesme e Zhvillimit të Bankës së Shqipërisë përcakton objektivat institucionalë të Bankës së Shqipërisë për periudhën 2025-2027, duke shërbyer gjithashtu si udhëzues për përgatitjen e buxhetit orientues afatmesëm.

Sipas njoftimit të Bankës së Shqipërisë, strategjia synon t’u japë një përgjigje proaktive sfidave të mjedisit ku operon Banka e Shqipërisë; të rrisë bashkëpunimin brenda institucionit; të nxisë përdorimin efektiv dhe eficient të burimeve; si dhe të promovojë transparencën dhe llogaridhënien publike.

Ajo përfshin funksionet kryesore të BSH-së: politikat (politika monetare, rezerva valutore, mbikëqyrja bankare, politika makroprudenciale), infrastrukturën financiare (emisioni i parasë, sistemet e pagesave); funksionet horizontale (kërkimet, statistikat); dhe shërbimet mbështetëse (burimet njerëzore, kontrolli i brendshëm, kontabiliteti dhe IT).

Informacioni për zbatimin e Strategjisë Afatmesme të Zhvillimit është pjesë e rregullt e raporteve vjetore të Bankës së Shqipërisë.

Gjithashtu, Këshilli Mbikëqyrës miratoi edhe buxhetin e Bankës së Shqipërisë për vitin 2025 dhe buxhetin orientues afatmesëm për vitet 2026 – 2027

Sipas njoftimit të Bankës së Shqipërisë, buxheti i miratuar për vitin 2025 dhe ai orientues afatmesëm për vitet 2026-2027 garanton përmbushjen e objektivave strategjikë të institucionit të parashikuar në Strategjinë e saj Afatmesme të Zhvillimit.

Në hartimin e tij janë mbajtur parasysh situata aktuale në tregjet ndërkombëtare financiare, zhvillimet ekonomike dhe financiare brenda vendit, shpenzimet korrente dhe ato kapitale të domosdoshme për miradministrimin e aktiveve dhe burimeve njerëzore.

Buxheti i Bankës së Shqipërisë për vitet 2026 – 2027, ndër të tjera, synon përsosjen e mëtejshme të kuadrit të politikës dhe të operacioneve monetare, zhvillimin e mëtejshëm të kapaciteteve profesionale të Bankës së Shqipërisë, furnizimin e ekonomisë me kartëmonedhë cilësore, përpunimin me kujdes të saj, si dhe përsosjen e komunikimit dhe transparencës me publikun.

Njëkohësisht, buxheti mbështet kryerjen e investimeve të nevojshme për përmirësimin e infrastrukturës teknologjike, asaj të sigurisë dhe të ambienteve ku ushtrohet aktiviteti i Bankës së Shqipërisë./ Monitor.al