LEXO PA REKLAMA!

SHKARKO APP

Familjarët në shtëpinë e dëmtuar/ Bashkia fsheh ekspertizën

19 Janar 2023, 22:50, Denoncim CNA

Familjarët në shtëpinë e dëmtuar/ Bashkia fsheh

Në Ponçarë të Bilishtit, dy familje janë rikthyer të jetojnë në banesën që ua shembi tërmeti i vitit 2019. Për dy vjet u trajtuan me bonus qiraje, por këtë vit Bashkia Devoll, ua ndërpreu bonusin dhe i la të rikthehen në banesën, që është e nivelit më të rëndë të dëmtimit.

“Për dy vjet rresht u trajtua me bonus qiraje. Jetuam në Bilisht normalisht. Premtimet ishin që të shpëtonin jetë njerëzish nga ana e zyrtarëve të bashkisë. Të kënaqur ishim, kuptohet. Vitin e 3 rinovuam kontratat e qirasë të merrnim bonus. Nga Janari deri në Maj nuk na dhanë asnjë shpjegim”, u shpreh denoncuesi.

Instituti i Ndërtimit e ka shpallur të pabanueshme dhe u kërkon organeve, që të ndërtojnë një shtëpi të re për 10 pjesëtarët e dy familjeve. Denoncuesi Resul Oçka, tregon se bashkia u ka fshehur akt-ekspertizën e thelluar të Institutit të Ndërtimit, që më në fund e tërhoqën vetë pranë këtij institucioni.

“Deri tani nuk kemi marrë asnjë përgjigje. Kanë vënë edhe shiritin e kuq këtu. Erdhëm. Frikë kemi, xhani na e di. Bonusi i qirasë na u ndërpre. Masa, bashkia nuk merr. Asnjë lloj shpjegimi. Është e pamundur. E keqja është që këtë dokument nuk e njohin sot. Kemi bërë kërkesa, gjoja se ky ka ardhur zyrtarisht që më 20 Qershor të 2020”, tha ai.

Bashkia pretendon se nuk e ka shkresën e dëmtimit ndërsa emergjencat e kanë çuar që në Qershor. Në fund bashkia na nis një përgjigje, se nuk i ka kapacitetet e duhura për rindërtim dhe sapo t’i ketë, do nisë nga puna.

Arben Lacka, Emergjencat Civile: Po ça…, o Resul! O Resul, në telefon unë po të them kaq: Me atë pjesë, më vjen keq të ta them, por nuk kam çfarë të të bëj. Ja, unë këtu jam me këta të Prefekturës, me Zarifin, me Petron, dhe e diskutuam prapë problemin tënd. Po nuk mundemi dot, o vëlla, se ka kaluar çdo gjë tani.

Gazetari: Pse nuk mundeni dot ju, zoti Lacka, jam gazetar i emisionit “Stop”. Pse nuk mundet?

Arben Lacka: Po nuk mundet, se ka kaluar si afat.

Gazetari: Ku keni qenë ju lidhur me këtë familje duke qenë se e dini dhe kishit një dokument të institutit të ndërtimit.

Arben Lacka: Jo, nuk kemi pasur dokument. Po, bashkia nuk e ka.

Gazetari: Si nuk e ka? E kam unë dhe nuk e ka bashkia e Devollit?

Arben Lacka: Nuk është shprehur Instituti i Ndërtimit për këtë pjesë.

Gazetari: E kam origjinalin këtu.

Arben Lacka: Po më vjen keq, pra!

Gazetari: Mos të të vijë keq fare i nderuar sepse këta po banojnë akoma këtu, ku e kanë kontratën e qirasë, pse ia keni ndërprerë bonusin.

Arben Lacka: Sepse e ndërpreu Prefektura, se nuk mund të trajtohen gjithë jetën me bonus qiraje.

Gazetari: Të vdesin këtu këta, 10 veta?

Arben Lacka: Jo, nuk jemi me atë.

Gazetari: Ku jeni juve që këta janë futur tani këtë?

Arben Lacka: Çfarë të të them në telefon?

Gazetari: Ky është një shqetësim për të vënë duart në kokë. Instituti i ndërtimit kërkon që të bëhet shtëpi e re nga e para sepse këtu nuk jetohet, është e pabanueshme mor zotëri. Ju lutem merrni masa urgjent. Të vini këtu, t’i siguroni ku do rrinë, ku s’do rrinë. Si bashki duhet të kishit bërë të pamundurën dhe të kishit vënë ujin në zjarr për 10 pjesëtarë që po vazhdojnë të jetojnë këtu. Siguroni kontratën e qirasë për aq kohë sa do dojë të bëhet shtëpia nga e para. Dakord?

Arben Lacka: Mirë, mirupafshim!

Ndërkohë, Instituti i Ndërtimit informon se, që në vitin 2020 i ka nisur akt ekspertizën e thelluar për këtë banesë Bashkisë Devoll, ndryshe nga sa tha zyrtari i kësaj bashkie./tvklan.al

Lajmet e fundit nga