web counter
LEXO PA REKLAMA!

SHKARKO APP

App Store
Google Play

“Zjarri ka dalë jashtë kontrollit”/ Himçi: Inceneratori po djeg paratë e shqiptarëve

2 Korrik 2025, 13:12, Aktualitet CNA

“Zjarri ka dalë jashtë kontrollit”/ Himçi:

Anëtari i Këshillit Bashkiak të PD-së në Elbasan, Blendi Himçi, në një deklaratë për mediat, është shprehur se zjarri në landfill ka dalë jashtë kontrollit.

Himçi ështe shprehur se vjedhja e ngritur në sistem po u kushton qytetarëve jo vetëm në financa, por edhe në shëndet dhe siguri jete.

Himçi tha se inceneratori jofunksional tani po djeg paratë e qytetarëve, ndërsa ngriti akuzën ndaj kryeministrit Rama dhe qeverisë.

“Zjarri i rënë që prej ditës së djeshme në landfillin e Elbasanit është një tjetër provë se si vjedhja e ngritur në sistem po u kushton qytetarëve jo veten ne financa, por edhe ne shëndet dhe siguri jete.

Në vend që mbetjet të digjeshin pak metra më tutje, në inceneratorin që ka kushtuar jo pak, por 26 milionë euro, dhe që qytetarët e paguajnë nga taksat e tyre pikërisht për këtë qëllim, zjarri, i cili duket se ka dalë jashtë kontrollit, përveçse akuzë për një qeveri të korruptuar që nuk ka lënë gjë pa bërë, tashmë po helmon gjithë Elbasanin.

Inceneratori i Elbasanit, që nga ndërtimi i tij në vitin 2017, nuk ka djegur asnjë ton plehra dhe nuk ka prodhuar asnjë kilovat energji. Por para po djeg pa fund. Vitin e kaluar, një kompani e afërt me Ramën fitoi tenderin e shpallur nga kompania shtetërore ‘Eco Alb’ për menaxhimin e mbetjeve në landfill, me vlerë rreth 400 mijë euro, duke u favorizuar jo pak nga Latja i Elbasanit. Por ndërkohë që plehrat po digjen duke helmuar Elbasanin, kompania ‘Ergi’ e Nuri Ballës, kush e di se nga i ka zhvendosur kamionët e saj, me lejet e kullave apo fshatrave turistikë që i janë dhënë nga bashkëqytetarja e tij, Adelajda Roka, me urdhër të Ramës.

Zjarri në landfillin e Elbasanit nxjerr në pah nevojën emergjente që Edi Rama kishte në këtë qytet për të vjedhur vota. E pra, duket qartë se Sara e Suel Çelës, Olsi i vetingut, nuk do bëjnë gjë tjetër veçse do jenë garancia e vjedhjeve dhe mbulimi i skandaleve në qytetin e Elbasanit, ashtu siç është edhe tymi i landfillit që prej dy ditësh po helmon familjet e këtij qyteti.

Ky zjarr toksik është edhe kujtesa e hidhur se kur zgjedhjet jane farse, askush nuk jep llogari. Jemi në ditën kur askush as nuk kërkon më llogari. Partia Demokratike është i vetmi zë”, tha Himçi./ CNA





Lajmet e fundit nga