Zëvendëson Karçanajn në detyrë/ Kush është drejtori i ri i AKSHI-t

13 Shkurt 2026, 13:17, Aktualitet CNA

Zëvendëson Karçanajn në detyrë/ Kush është

Igli Tafa është emëruar në krye të AKSHI-t, pas dorëheqjes së Mirlinda Karçanajt.

Po kush është Igli Tafa?

Igli Tafa ka përfunduar studimet në Universitetin Politeknik të Tiranës, në inxhinieri rrjetesh dhe siguri informacioni.

Ai është mbështetës i zhvillimeve teknologjike dhe ka ekspertizë në menaxhimin e sigurisë, kërcënimet dhe administrimin e rrjetit.

Tafa ka një karrierë të larmishme akademike duke shërbyer si lektor në Universitetin Politeknik të Tiranës në fushën e teknologjisë dhe informacionit.

Me një karrierë mbi 16-vjeçare në fushën akademike dhe të sigurisë së informacionit, Tafa ka kontribuuar në avancimin e kërkimit dhe zhvillimin e teknologjive të reja për të adresuar kërcënimet në këtë fushë.

Ai ka qenë udhëheqës në shumë projekte, ka shërbyer si këshilltar për organizata të ndryshme dhe ka kontribuuar në panele dhe konferenca ndërkombëtare.

Që nga tetori i vitit 2022, Tafa shërben si Drejtor i Përgjithshëm i Autoritetit Kombëtar të Sigurisë Kibernetike si dhe Koordinator Kombëtar për Sigurinë Kibernetike, duke kontribuuar në zhvillimin e politikave dhe strategjive për mbrojtjen e infrastrukturave të informacionit nga kërcënimet dhe sulmet kibernetike.

Nën këtë udhëheqje, AKSK ka ndërmarrë një sërë nismash të rëndësishme si në nivel strategjik ashtu edhe në atë operacional, duke e renditur Shqipërinë ndër vendet e para që kanë miratuar direktivën NIS2.

Një nga treguesit më pozitivë gjatë udhëheqjes së tij është forcimi i bashkëpunimit me partnerë strategjikë si Departamenti Amerikan i Shtetit, me mbështetjen e të cilit janë zbatuar një sërë projektesh për të rritur kapacitetet e ekspertëve në fushën e sigurisë kibernetike.

AKSK punon ngushtë me organizata ndërkombëtare si NATO, OSBE, OKB, në përmbushjen e angazhimeve në terren.

Gjithashtu ka pasur përparim në iniciativat për të forcuar bashkëpunimin me partnerët në rajonin e Ballkanit Perëndimor, dhe jo vetëm, për krijimin e platformave të komunikimit me qëllim ndërtimin e një klime dhe hapësire rajonale, të besueshme në sigurinë e informacionit.

Nën udhëheqjen e tij, AKSK ka intensifikuar bashkëpunimin me institucionet publike dhe private brenda vendit përmes organizimit të trajnimeve periodike dhe nënshkrimit të marrëveshjeve të shumta të bashkëpunimit për ndarjen e informacionit, ekspertizës dhe praktikave më të mira.

Pjesë e arritjeve të AKSK është anëtarësimi që nga maji i vitit 2023 në iniciativën globale, Counter Ransomware (CRI) të udhëhequr nga SHBA-ja, e cila synon të mbrohet nga Ransomware në aspektin e rritjes së kapaciteteve, teknologjisë dhe procedurave.

Me angazhimin e Tafës u arrit krijimi i një strukture të re të Autoritetit, e cila përfshin ekipe të specializuara dhe të trajnuara në fushën e sigurisë kibernetike, të afta të identifikojnë dhe të përballojnë kërcënimet në kohë reale dhe të mbrojnë sistemet kritike./ CNA