Zbardhen përpjekjet e ish-Presidentit të SHBA-së/ Riçard Nikson kërkoi të vijë në Tiranë, përgjigjja e Enver Hoxhës

17 Korrik 2022, 18:22, Aktualitet CNA

Zbardhen përpjekjet e ish-Presidentit të SHBA-së/ Riçard

Ish-Presidenti i SHBA, Richard Nikson

Ish-ministri i Jashtëm, Paskal Milo, ka treguar disa përpjekje që janë bërë në vitin 1982 në mënyrë telegrafike, kur SHBA po tentonte të vendoste marrëdhënie diplomatike me Shqipërinë.

Pak ditë më parë, Milo ka zbuluar se ish-Presidenti i 37-të i SHBA-së, Riçard Nikson, tentoi të vinte për një vizitë jozyrtare në Tiranë.

Ai ka rrëfyer se për këtë i ka kërkuar ndihmë diktatorit rumun Nikolai Çaushesku, por Enver Hoxha e ka pritur ekstremisht negativisht mesazhin që vinte nga Rumania, nëpërmjet ambasadorit shqiptar, Jordan Pani.

Sipas tij, Hoxha ka urdhëruar ambasadat shqiptare nëpër botë të refuzojnë në mënyrë kategorike ftesat e përfaqësuesve amerikanë dhe sovjetikë.

“Është interesante, jo nga të gjithë dihet, që në në vitin 1982, ish Presidenti i SHBA-ve, Richard Nikson, i viteve 1969 – 1974, ishte për vizitë në Rumani dhe u prit me nderime nga Çaushesku, diktatori rumun. Në një prej atyre ditëve që ishte në Bukuresht, ministri i Jashtëm rumun, që quhej Stefan Andrei, që ishte një nga udhëheqësit kryesorë, anëtar i byrosë politike të Partisë Popullore rumune, siç quhej në atë kohë, thërret në një takim të veçantë ambasadorin e Shqipërisë në Bukuresh, Jordan Pani. Ai i komunikon, që në emër të Presidentit Çaushesku, t’i përcillte një mesazh. Mesazhi ishte ky, që ish-Presidenti amerikan Richard Nikson, i lutet Presidentit Çaushesku që të ndërmjetësojë pranë Enver Hoxhës në Tiranë, që Niksoni të vijë për një vizitë jo zyrtare në Shqipëri.

Jordan Pani, ambasadori menjëherë e kishte bërë detyrën, absolutisht e përcolli mesazhin në Tiranë dhe ministria e Jashtme menjëherë ia çoi Enver Hoxhës mesazhin. Enver Hoxha sa e pa këtë mesazh reagoi në mënyrë negative, në mënyrë ekstreme negative. Me porosi të tij, ministria e Punëve të Jashtme bëri një notë ose dërgoi urgjentisht radiograme të gjitha ambasadave shqiptare nëpër botë, ku ishin dhe ku nuk ishin. Me porosi të veçantë i urdhëronte se nëse do të vinin përfaqësues amerikanë ose sovjetikë, të këtyre niveleve që kërkojnë të vijnë në Shqipëri, ju në mënyrë kategorike do ta refuzoni”, theksoi ish-ministri në emisionin “Drejt” të Luan Ramës./ B.A. - CNA.al