Vrasja e Elvis Dedajt/ Dëshmia në GJKKO: Mund të jetë porositur nga Festim Qoli, ishin zënë për një vajzë

6 Nëntor 2025, 12:36, Aktualitet CNA

Vrasja e Elvis Dedajt/ Dëshmia në GJKKO: Mund të jetë

Këtë të enjte, në GJKKO po zhvillohet seanca e radhës për dosjen “Plumbi i artë”. Sot dha dëshminë e tij mbi vrasjen e Elvis Dedajt në vitin 2012, një nga të pandehurit e çështjes, Agim Gjini.

Gjatë dëshmisë, Gjini mësohet të ketë treguar se mes viktimës dhe ortakut të tij Festim Qolit kishte pasur vazhdimisht mosmarrëveshje për një vajzë.

Gjini rrëfeu se Qoli mund të ketë qenë porositësi i vrasjes së Dedajt, që mund të ishte nxitur për shkak të këtij konflikti personal.

“Kam qenë furnitor në një pikë karburanti në dalje të Shkozetit. Më punësoi Festim Qoli, me të u njoha në shkollë në 8-vjeçare. Elvis Dedjan e njihja, e kishim mik unë dhe Festimi. Elvisi ishte ortak me Festimin, menaxher ishte Kujtim Hasa. Gjatë kohës që punoja në karburant kishte një hatërmbetje për një vajzë, mes Festimit dhe Elvisit. Elvisit i thërrisnin 'Loshi', ai punonte me lloj-lloj gjërash. Me drogë.

Për vrasjen e Elvis Dedjës e dëgjova te karburanti, erdhi policia dhe më arrestoi. Jam takuar me Festim Qolin pas vrasjes së Elvisit, disa dite pas ngjarjes. Festim Qoli është thirrur në polici për këtë çështje. Fatmira Habilin, nënën e Elvisit, e njihja, e kam takuar, i kam bërë hyzmet dhe na ka bërë. Ajo vinte rrallë në karburant. Fatmira nuk më ka thëne se ku dyshonte për vrasjen e të birit. Rrinte me Festimin, marrëdhëniet i kishte të mira. Elvisi ka pasur një 'BMW'. Festim Qoli ishte pronar i biznesit bashkë me Elvisin. Marrëdhëniet mes tyre kanë qenë shumë të mira.

Nuk shkonin mirë vetëm për punën e femrës. Nuk donte që Elvisi ta merrte atë sepse kishte shkuar Festimi me të. Nuk e di kush e vrau. Ditën që ndodhi ngjarja, unë kisha babain pa qejf që më ndërroi jetë pas disa ditësh, kam qenë te shumica në supermarket mora ushqime për t'i dërguar te lokali. Pika e karburantit kishte dhe lokal, mora ujë, kafe… pastaj më arrestoi policia. Kujtim Hasa punonte në lokal, kishte dhe punonjës të tjerë, nuk më kujtohen emrat. Vrasja ndodhi në Malin e Robit, nuk shkova në vendngjarje. Për gjysmë ore e mora vesh ngjarjen.

I kisha takuar edhe viktimën, edhe Festimin te karburanti. Petrit Qoli vinte te karburanti e takonim përditë. Më shoqëruan ditën e ngjarjes dhe më morën në pyetje në polici. Na morën shenjat e gishtave, na morën dëshminë dhe kaq. Festimin e takova pas vrasjes, folëm për ngjarjen. Ai kishte frikë për ngjarjen që ndodhi, kishte hall se mos vriste njeri dhe atë. U paraqit dhe Festimi në polici për t'u pyetur. Deri më sot, kam pasur marrëdhënie të mira me Festimin, para se të arrestohesha. Pas vrasjes së Fatmira Dedës, Festimin e kam parë me automjet tip 'Lincoln'”,-thuhet në dëshmi./CNA