E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

U arrestua për dhunë ndaj gruas dhe armëmbajtje pa leje/ Gjykata lë në qeli ish-drejtorin e burgut të Fushë-Krujës

5 Dhjetor 2023, 10:32, Aktualitet CNA

U arrestua për dhunë ndaj gruas dhe armëmbajtje pa leje/ Gjykata

Të martën, Gjykata e Korçës ka lënë në burg Durim Toskën, ish-drejtorin e Burgut të Fushë-Krujës, i cili tri ditë më parë u arrestua në flagrancë në Pogradec për dhunë ndaj gruas së tij dhe armëmbajtje pa leje.

Në seancën e përcaktimit të masës së sigurisë, prokuroria kërkoi arrest me burg për 53-vjeçarin deri në përfundim të hetimeve, kërkesë që u pranua nga gjykata.

Dy avokatët mbrojtës të Toskës kërkuan një masë sigurie më të lehtë me argumentin se 53-vjeçari nuk e kishte dhunuar bashkëshorten, por kishin pasur një debat normal familjar.

Mësohet se edhe bashkëshortja ka tërhequr akuzën për dhunë në familje.

Sa i takon armës së gjetur nga policia gjatë kontrollit të banesës, Toska ka mohuar të ketë dijeni për ekzistencën e saj. Durim Toska u arrestua tri ditë më parë nga policia e Pogradecit, pas denoncimit të bashkëshortes për dhunë në familje. Gjatë kontrollit të banesës policia gjeti dhe një pistoletë model çek të cilën e mbante pa leje.

Kush është Durim Toska?

Toska, një militant dhe drejtues i Partisë Socialiste në Pogradec, u arrestua pas kallëzimit të bërë nga e shoqja e tij nën akuzën se ai e kishte dhunuar.

Pas arrestimit të tij u bënë publike dhe lajmet lidhur me punën që Toska ka bërë.

Më herët ai ka mbajtur pozicionin e shefit të rendit në Maliq, drejtorit të Kontrollit të Territorit në Bashkinë Pogradec për 4 vite me radhë dhe më vonë u emërua drejtor i burgut të Pojskës.

Ai po ashtu ka mbajtur postin e drejtorit të burgut në Fushë-Krujë.

CNA ka mësuar gjithashtu nga burime se para vitit 2005 Toska ka qenë pjesë e grupit të shoqërimit të ish-kryeministrit Fatos Nano.

Toska mesa duket ka pasur një karrierë të gjatë, por raportet me të shoqen e vunë atë në qendër të vëmendjes jo për punën dhe kontributin që mund të jepte në komunitet, por për dhunën e ushtruar ndaj bashkëshortes./CNA