E fundit!

14:42 Editorial

Çmenduria e një avokati të pandehur

Plarent Ndreca na qenka bërë sot autor i një zbulimi epoka...

Marrëveshja për emigrantët/ Kryebashkiaku i Memaliajt, kërkesë Ramës, zbardhet letra

4 Dhjetor 2023, 17:46, Aktualitet CNA

Marrëveshja për emigrantët/ Kryebashkiaku i Memaliajt,

Edi Rama dhe Giorgia Meloni

Kryebashkiaku i Memaliajt, Albert Malaj përmes një letre drejtuar kryeministrit Edi Rama kërkon që një pjesë e emigrantëve të strehohen në Memaliaj.

Kjo lëvizje e kryebashkiakut të Memaliajt vjen në kuadër të marrëveshjes mes kryeministrit Edi Rama me homologen e Italisë, Giorgia Meloni që në Shqipëri të strehohen emigrantë të vendeve të treta.

Dy kampet e tyre do të vendosen në Shëngjin në Lezhë.

Malaj thekson se mbështetur në eksperiencën e tij si ushtarak, i përgatitur për menaxhimin dhe mbarëvajtjen e procesit të strehimit të emigrantëve të huaj i kërkon kyreministrit që emigrantët mund të vijnë dhe në Memaliaj.

Letra e plotë:

Duke iu uruar punë të mbarë!

Po iu drejtohem nëpërmjet kësaj letre në cilësinë e kryetarit të Bashkisë Memaliaj, në emër të gjithë komunitetit të bashkisë për të shprehur mbështetjen tonë si një përgjigjie humanitare ndaj situatës aktuale që përfshin emigrantët që kanë gjetur strehim në Europë.

Bazuar në marrëveshjen e lidhur mes Kryeministrit të Shqipërisë me Kryeministrin e Italisë, në të cilën është dakortësuar për sjelljen e emigrantëve dhe azilkërkuesve afrikan nga Italia në kampe të vendosura në Shqipëri, është momenti të tregojmë mikpritjen tonë nisur nga përjetimi dhe mikpritja që ne për shumë vite si emigrantë e kemi gjetur në shtetet europiane.

Bashkia Memaliaj shpreh gatishmërinë e saj për të strehuar një pjesë të emigrantëve nisur dhe nga eksperienca e fituar në vitin ‘98 duke strehuar dhe treguar traditën e mikpritjes ndaj vëllezërve tanë të Kosovës, mbështetur në dakortësimin e komunitetit i cili është i gatshëm për të dhënë kontribut pozitiv në jetesën e emigrantëve, zotërimi i hapësirave dhe ambjenteve të përshtatshme akomoduese, si dhe pozicionimi i favorshëm i territorit të bashkisë në afërsi të portit të Vlorës dhe Sarandës. Mbështetur edhe në eksperiencën time profesionale si një ish ushtarak, i kualifikuar për menaxhimin e krizave të refugjatëve në misionet e ngarkuara jashtë Shqipërisë jam i përgatitur dhe i gatshëm për të siguruar mirëmenaxhimin dhe mbarëvatjen e procesit të strehimit të emigrantëve të huaj dhe në Bashkinë Memaliaj.

Duke Ju falenderuar për marrjen në konsideratë të këtij propozimi, kërkojmë mundësinë e angazhimit në një dialog konstruktiv me autoritetet relevante mbi detajet dhe logjistikën e strehimit të emigrantëve në Bashkinë Memaliaj.

Mbetemi në pritje të një përgjigjie pozitive nga ana juaj.

Me respekt, Albert Malaj./ CNA