E fundit!

09:27 Kronika

E rëndë në Korçë, 66-vjeçari i jep fund jetës

Rreth orës 08:40, në lagjen nr. 10, Korçë, një automjet ti...

Tentuan të arratisen nga burgu/ Dan Hutra dhe 3 të tjerë kalojnë në regjim të posaçëm

5 Janar 2024, 11:25, Aktualitet CNA

Dan Hutra

Dan Hutra dhe 3 të tjerë kanë kaluar në regjim të posaçëm pas tentativës së tyre të një dite më parë për arratisje nga burgu.

Ditën e djeshme Drejtoria e Përgjithshme e Burgjeve dha detaje nga plani i arratisjes së vrasësit të grave, Dan Hutra.

Sipas njoftimit, thuhet se Hutra ka bashkëpunuar për të realizuar këtë plan me 3 persona të paraburgosur. Bëhet fjalë për shtetasit Martin Kapllani, Geraldo Veizaj dhe Feti Kovaçi.

Personat e sipërpërmendur dhe Dan Hutra kishin nisur prerjen e zgarës së dritares me mjete të improvizuara.

Mjetet u gjetën nga punonjësit e sigurisë në dhomën nr. 15, ku qëndronte vrasësi i grave, së bashku me një çarçaf të përshtatur si litar.

Krimet e Dan Hutrës

Të mërkurën e 1 marsit 2023 40-vjeçari Dan Hutra, një ish-i dënuar, vrau 3 gra dhe plagosi tri të tjera, në tri zona të ndryshme të Tiranës.

Fillimisht, me një mjet tip “Benz” të zi, ai shkoi në Astir me një kallashnikov dhe thikë brenda makinës. Dan Hutra plagosi me thikë ish-të dashurën e tij, 40-vjeçaren me iniciale M. G. dhe i mori asaj me dhunë një shumë parash.

Më pas, ai shkoi në banesën e ish-bashkëjetueses së tij në Kodër-Kamëz dhe plagosi me armë zjarri ish-bashkëjetuesen Elena Hysa dhe nënën e saj Kujtime Hysa.

Gjithashtu, ai vrau me armë motrën e ish-bashkëjetueses Mevlute Hysa dhe kunatën e saj Hasime Dafku.

40-vjeçari nuk u mjaftua me kaq, por shkoi në Bathore dhe vrau edhe 31-vjeçaren Etleva Kurti, raporton CNA.

Kjo e fundit ishte motra e Vladimir Kurtit, një person ky me të cilin Dan Hutra kishte pasur një debat të ashpër teksa vuanin të dy dënimin në të njëjtin burg.

Autori i pashpirt u arrestua disa orë më vonë dhe nuk shprehu pendesë për vrasjet, madje tregoi se kishte planifikuar të ekzekutonte edhe një person të katërt, një burrë në Vaqarr që e fajësonte për humbjen e jetës së babait të tij.

Dan Hutra ka një skedë të pasur kriminale ku përfshihen vepra të ndryshme penale për përdhunim, pengmarrje, vrasje, 2 tentativa të bujshme arratisjeje, sherret në burg, vjedhje, në total 20 vite histori kriminale./ CNA