web counter
LEXO PA REKLAMA!

SHKARKO APP

App Store
Google Play

Teatri i palaçove/ Deputetët e Lulit ankimojnë dhe protestojnë për vulën dhe nuk paraqiten në gjykatë

13 Nëntor 2022, 21:13, Aktualitet CNA
Teatri i palaçove/ Deputetët e Lulit ankimojnë dhe
Fotomontazh - Lulzim Basha dhe Enkelejd Alibeaj

Më datën 4 tetor, megjithëse është e paparë dhe e padëgjuar më përpara, deputetët e Lulzim Bashës shkuan dhe protestuan përpara Gjykatës së Apelit në Tiranë se duan datën e gjyqit për vulën e PD.

Një budallallëk i padëgjuar, por i justifikuar për çfarë janë e përfaqësojnë Luli dhe sekti i tij i deputetëve. Vetëm 6 muaj pasi ishte bërë ankimimi, deputetët e Lulit kërkuan të afrohet data, pasi u mungon vula. Megjithëse s’kanë asnjë njeri t’i ndjekë nga pas, hall kanë vulën.

Ishin pikërisht deputetët Dashnor Sula dhe Saimir Korreshi (korifej të drejtësisë) që dolën para gjykatës dhe kërkuan që ky organ të japë një vendim të përshpejtuar për vulën e Partisë Demokratike.

Ndërkohë që shqiptarët kanë 3-4 vjet që presin për hallet e tyre në gjykatat e Apelit për shkak të Reformës në Drejtësi dhe pasojave që ajo sjell, Lulzimsave u digjet barku për vulën. Gjykata ende po shqyrton dosjet e 2018-ës dhe 2019-ës, halli i deputetëve të Bashës ishte data për vulën, por edhe këtu sërish tregojnë sa vlejnë e çfarë e kanë këtë skenar kaq banal.

Drejtësia duhet të shqetësohej, sipas tyre, për një sherr vule kur janë me mijëra raste problematikash e hallesh të shqiptarëve.

Gjykata sipas rendit dhe shorteve të hedhura nxori datën 3 nëntor dhe çfarë ndodh, përfaqësuesi i tyre ligjor, Indrit Sefa, nuk u paraqit dhe depozitoi kërkesë për shtyrje seance me pretendimin e arsyes shëndetësore.

Gjykata e Apelit shtyu gjyqin për në datën 10, por edhe këtë herë përfaqësuesi ligjor i Bashës dhe Alibeajt nuk u paraqit dhe kërkoi shtyrje të seancës.

Pra, padia u bë nga deputetët e Lulzim Bashës, apelimi u bë nga deputetët e Lulzim Bashës, afrimi i datës u bë me protestë nga deputetët e Lulzim Bashës, u shpall data dhe nuk shkoi përfaqësuesi ligjor i Lulzim Bashës dhe Enkelejd Alibeajt, u shty data dhe sërish së dyti nuk shkoi përfaqësuesi ligjor i Lulzim Bashës dhe Enkelejd Alibeajt. Avokati i tyre një nga konsulentet ligjorë të kompanive të inceneratorëve, ishte në mbledhje me Alibeajn një natë përpara gjyqit, por të nesërmen u "sëmur". 

Ky është një teatër palaçosh politikë, asgjë më shumë sesa kaq, faktet flasin vetë. Bënë padi, e ankimuan në Apel. Shkuan protestuan përpara Apelit, kërkuan që data të afrohet, data u shpall dhe ata nuk shkuan në gjyq.

Këta janë palaço politikë publikë që mendojnë se janë të sofistikuar, por janë thjesht edhe më qesharakë se mund të mendohet.

Të kërkohet shtyrja e seancave gjyqësore kur ti je palë që nuk e ke hapur vetë çështjen, që nuk kërkon afrimin e datës, që nuk beson te kallëzuesi është diçka e njohur në drejtësi, por të ankimosh, të protestosh për datën para gjykatës që të afrohet, data shpallet dhe ti nuk shkon dy herë, atëherë përse ankimon dhe për çfarë proteston?

Thjesht për të treguar që janë sharlatanë, inatçinj e të pavlerë që janë varur pas disa mandatesh të dhuruara nga Lulzim Basha që po i përdor tashmë si palaço publikë./ CNA.al





Lajmet e fundit nga