“Të thithësh vdekjen”/ Studimi nxjerr zbuluar Veliajn: Ajri në Tiranë i ndotur

31 Janar 2024, 11:37, Aktualitet CNA

“Të thithësh vdekjen”/ Studimi nxjerr zbuluar Veliajn:

Erion Veliaj

Vullnetarë të projektit "Mushkëri të Gjelbra për qytetet tona” në Shqipëri në gjetjet e tyre kanë zbuluar se Tirana dhe Elbasani janë qytetet më të ndotura në Shqipëri.

Sipas tyre burimi kryesor i ndotjes së ajrit janë sektori i ndërtimit, automjetet e vjetruara dhe industria e rëndë.

Në gjetjet e bëra këto vite në Tiranë, Rodioni dhe ekipi i tij listojnë si problematik dioksidin e azotit (NO2) që emetohet nga djegia e karburanteve dhe PM2.5, grimcë e ngurtë me diametër 2.5 mikronë që gjenerohet kryesisht nga sektori i ndërtimit dhe djegia e karburantit, që janë ndjeshëm mbi normat e lejuara të BE-së dhe OBSH-së.

Tri vitet e fundit ata kanë monitoruar në mënyrë të pandërprerë cilësinë e ajrit në Tiranë, duke u shtrirë më pas edhe në qytetet e Elbasanit, Durrësit, dhe Shkodrës nëpërmjet 1.200 pikave të ndryshme monitorimi.

Rodion Gjoka, ekspert mjedisi dhe pjesëtar i projektit të financuar nga BE që në zanafillën e tij, thotë se tashmë e gjithë Tirana është e ndotur.

Ky studim nxjerr zbuluar nga ana tjetër kryetarin e Bashkisë Erion Veliaj, e cila sa herë mbjell një pemë deklaron se Tirana është më e pastër.

“Kur filluam punë në Bashkinë e Tiranës, sateliti Kopernik, i cili mat cilësinë e ajrit në të gjitha qytetet e Europës (është një shërbim pa pagesë i BE-së), nga një vlerësim 1-10, Tiranës i jepte vlerësimin 2-3. Sot, tani që po flas po futem live në aplikacion, vlerësimi për cilësinë e ajrit në Tiranë është 8, kurse në ditët pa makina shkon 9-10. Ky vlerësim nuk është 8 sepse flasim bukur, por është i tillë sepse kemi marrë vendimet e duhura. Qendra e Tiranës, nga një rrethrrotullim i madh makinash, sot është sheshi më i madh në Europën Juglindore. Pazari i Ri, nga një vend ngarkim-shkarkimi në mes të Tiranës, sot është një tjetër hapësirë pa makina. Këtu, mbas kurrizit tonë, ishte një landfill i vogël, m’u në qendër të Tiranës, Muret e Kalasë, por sot është një tjetër hapësirë e kthyer jo vetëm në një pol ekonomik me shumë biznese, por edhe më e pastër. Kjo do të thotë se e paskemi vetë në dorë. Mënyra se si sillemi, mënyrë si investojmë, si i marrim vendimet dhe nëse i reflektojmë këto vendime, ashtu siç i themi në këto takime, atëherë marrim rezultatet për të cilat ju fola dhe sot Tirana është një nga qytetet më të pastra në rajon”, deklaronte kohë më parë Veliaj.

Ndërsa Erion Veliaj mburret se Tirana është një qytet i pastër ndryshe nga vitet e kaluar ky studim e nxin atë, duke e klasifikuar në listën e qyteteve më të ndotura të Shqipërisë dhe në krye si qyteti më i ndotur i Shqipërisë./ CNA