E fundit!

21:44 Kronika

Të shtënat në Elbasan/ Policia jep detaje për ngjarjen

Mësohen detaje të reja lidhur me ngjarjen e ndodhur mbrëmj...

Shqipëria “e nxirë” nga krimet/ Çuçi: Policia e Shtetit, një nga institucionet më të besueshme nga publiku

19 Prill 2023, 09:51, Aktualitet CNA

Ministri i Brendshëm, Bledi Çuçi

Ministri i Brendshëm, Bledi Çuçi, në konferencën me krerët e Policisë të kryeqyteteve europiane është shprehur se Policia e Shtetit është një nga institucionet më të besueshme nga publiku.

Çuçi deklaroi se krimi i organizuar tashmë nuk njeh pasaportë dhe nënshtetësi dhe e vetmja mënyrë për ta luftuar është forcimi i bashkëpunimit me autoritetet jashtë vendit.

Sipas ministrit, Shqipëria ka një kontribut në sigurinë e Europës.

“Shqipëria ka një kontribut jo të vogël në sigurinë e Europës. Këtë nëpërmjet pjesëmarrjes aktive me operacione të përbashkëta policore.

Për t'ju sjellë një shembull, Shqipëria është i pari vend në Ballkanin Perëndimor që nënshkroi marrëveshje me Frontex, e cila vijon dhe ka rezultuar e sukesshme me kufirin.

Dihet se ne kemi kaluar tashmë fazën e shkëmbimit të informacionit për grupet kriminale dhe sot jemi me rol drejtues në operacione ndërkombëtare për goditjen e grupeve kriminale.

Kjo është një dëshmi e besimit që është krijuar nga bashkëpunëtorë europianë te policia që na vesh me më shumë përgjegjësi.

Sot jetojmë me rreziqe hibride ku krimi i organizuar nuk njeh shtet apo pasaportë. Jam i bindur se mund të luftohet pa kufi dhe pa pasaportë me bashkëpunim.

Them me krenari se policia është një nga institucionet më të besueshme nga publiku.

Ditët e fundit kemi bërë pjesë të policisë 3 mijë të rinj duke ruajtur moshën. Njëherësh jemi të foksuar te rritja e cilësisë së edukimit dhe trajnimit policor.

Krimi kibernetik po sfidon çdo ditë agjencitë tona ligjzbatuese dhe po cenon sigurinë e qytetarëve tanë”, është shprehur Çuçi.

Ndërkohë, vendi ynë çdo ditë është i nxirë nga krimet, vrasjet apo atentatet. Mediat e huaja shpesh shkruajnë artikuj rreth krimit të organizuar, ku pjesë e bandave kriminale janë shtetas shqiptarë.

Gjithashtu ngjarje që kanë tronditur opinionin publik vijojnë ende të jenë të pazbardhura.

Një nga misteret e pazbuluara është edhe zhdukja e Ervis Martinajt, i cili rezulton i zhdukur prej gushtit të vitit të kaluar.

Policia ende nuk ka dhënë detaje mbi fatin e tij, ndërsa në deklaratat e mëparshme, theksohet se nuk mund të ketë një informacion zyrtar pa u siguruar se çfarë ka ndodhur me të shumkërkuarin e drejtësisë.

Nga ana tjetër, kontrolle të shumta janë bërë në banesat e tij./ CNA.al