“Shantazh, kërcënime dhe presione në zgjedhjet e 14 majit”/ Çela prezanton raportin e shkeljeve në tri bashki

27 Korrik 2023, 12:13, Aktualitet CNA

“Shantazh, kërcënime dhe presione në zgjedhjet e 14

Drejtuesi politik i qarkut Kukës, Isuf Çela, ka prezantuar sot gjetjet e shkeljeve gjatë zgjedhjeve të 14 majit.

Në deklaratën për mediat, Çela theksoi se, faktet treguan që zgjedhjet e 14 majit në tri bashkitë e qarkut Kukës nuk përmbushën asnjë kriter apo standard demokratik për një proces zgjedhor të lirë dhe të ndershëm.

Sipas tij janë faktuar shantazhi, kërcënimet, presionet që kanë bërë piramida shtetërore e të gjitha institucioneve të këtij shteti.

Çela thotë se sistemi i patronazhimit funksionoi në çdo hallkë, para dhe gjatë ditës së zgjedhjeve, ndërsa nënvizon se KQZ nuk ka reaguar, por vetëm ka heshtur për të gjitha shkeljet.

“Denoncojmë farsën elektorale të ushtruar nga regjimi i Rilindjes në zgjedhjet e 14 majit në tri bashkitë e qarkut të Kukësit, në atë të Kukësit, Hasit dhe Tropojës, - tha Çela. - Faktet treguan se zgjedhjet e 14 majit në tri bashkitë e qarkut Kukës nuk përmbushën asnjë kriter apo standard demokratik për një proces zgjedhor të lirë dhe të ndershëm.

Është faktuar shantazhi, kërcënimet, presionet që kanë bërë piramida shtetërore e të gjitha institucioneve të këtij shteti.Sistemi i patronazhimit funksionoi në çdo hallkë, para dhe gjatë ditës së zgjedhjeve. KQZ nuk reagoi, por vetëm heshti.

Është provuar nga aktivistë të PD-së dhe të koalicionit 'Bashkë Fitojmë' veprimtaria e shitblerjes së votave edhe nën kërcënimin e armëve nga të afërmit dhe familjarët e kandidatëve të Partisë Socialiste. Është bërë raportim në Polici dhe kallëzim në SPAK. As njëri, as tjetri institucion nuk kanë reaguar. Kallëzimet ende presin në sirtarët e tyre. E gjithë administrata u vu në funksionim të blerjes së votave. Të gjitha sa thamë më lart do të listohen në secilën bashki. Regjimi i Rilindjes e bleu varfërinë e qytetarëve të qarkut të Kukësit si qarku më i varfër në vend, gjendje në të cilën e ka katandisur këtë qark në korrupsion, varfëri dhe shpopullim".