web counter
LEXO PA REKLAMA!

SHKARKO APP

App Store
Google Play

E fundit!

x

"Sfida mbetet balanca mes pavarësisë dhe llogaridhënies"/ Metani: ILD vendos standardet e reja të drejtësisë

9 Dhjetor 2025, 18:32, Aktualitet CNA

"Sfida mbetet balanca mes pavarësisë dhe

Kreu i Inspektoratit të Lartë të Drejtësisë, Artur Metani, në një deklaratë publike ka vënë theksin te rëndësia e procesit disiplinor në arkitekturën e re të drejtësisë, proces që për herë të parë është kompetencë e një institucioni të vetëm, ILD-së.

Metani tha se drejtimi i këtij institucioni ka sjellë përgjegjësi të jashtëzakonshme, pasi ILD-ja po ndërtohet mbi themele profesionale në një kohë kur pritshmëritë e publikut dhe aktorëve institucionalë janë të larta.

Sipas Metanit, sfida kryesore mbetet gjetja e ekuilibrit mes pavarësisë së magjistratëve dhe interesit legjitim të publikut për mënyrën e administrimit të drejtësisë.

Metani shprehu gjithashtu mirënjohje për ekipin e ILD-së, të cilët për muaj me radhë kanë kryer punë kërkimore në arkiva dhe biblioteka për të përgatitur historikun e shërbimit të inspektimit gjyqësor. Ai theksoi kontributin e inspektorit Periant Teta dhe punën e studiuesit Erind Mërkuri, si dhe falënderoi misionin EU4Justice për mbështetjen dhe financimin e botimit të këtij historiku.

Në mbyllje të deklaratës, kreu i ILD-së, Artur Metani, theksoi se sfida e vërtetë nuk është vetëm stabiliteti institucional, por garantimi i drejtësisë dhe forcimit të shtetit të së drejtës për të ardhmen e vendit.

 

Fjala e Metanit

 

Në këtë arkitekturë të re, procesi disiplinor vjen për herë të parë si kompetencë e një institucioni të vetëm, Inspektorit të Lartë të Drejtësisë, një institucion i pavarur kushtetues, që ka përgjegjësinë e inspektimit disiplinor për gjyqtarët e prokurorët e të gjitha niveleve. Zgjedhja në detyrën e Inspektorit të Lartë të Drejtësisë erdhi me përgjegjësinë e jashtëzakonshme, për përballjen me ngritjen e një institucioni të tillë me themele të forta profesionale, me pritshmëritë e publikut dhe aktorëve të tjerë politikë e institucionalë dhe me pritshmëritë e vetë sistemit të drejtësisë. Duke mos patur model paraardhës, vendosja e standardeve të tilla dhe mbi të gjitha, ruajtja e ekuilibrit mes pavarësisë së magjistratëve dhe interesit krejt legjitim të publikut për mënyrën se si administrohet drejtësia, ishte dhe mbetet busulla orientuese e Zyrës së Inspektorit të Lartë të Drejtësisë. Kjo mbetet sfida më e madhe profesionale dhe personale e Zyrës së Inspektorit të Lartë të Drejtësisë, jo për stabilitet institucional, por duke e parë këtë balancë interesash, si një parim kushtetues të rëndësishëm për të ardhmen e sistemit të drejtësisë dhe të shtetit të së drejtës. Natyrshëm si çdo proces, edhe testimi i kësaj filozofie pune, kërkon periudhën e vet të përballjes me sfidat që kalon sistemi dhe koha do të tregojë qëndrueshmërinë e zbatimit të saj në praktikë, si dhe efektet afatgjata në sistem.
Së fundmi, por jo nga rëndësia, do doja të bëja falenderimet shumë të merituara, të gjihkujt, që bëri të mundur këtë ditë sot. Dëshiroj të falenderoj inspektorin Periant Teta, ideja e të cilit për të parë shërbimin e inspektimit gjyqësor në vite, vuri në lëvizje të gjithë këtë proces pune.
Ekipin e ILD-së, që ka bërë një punë të shkëlqyer kërkimore, si në arkivin e shtetit ashtu edhe në bibliotekën kombëtare, edhe pse jo profesionistë të fushës së kërkimit. Për muaj e muaj të tërë, cdo ditë me këmbëngulje dhe pasion, kërkonin kudo, ku mund të kishte histori të shërbimit të inspektimit. Elis Kuçi, Zilie Feçi, Sidora Tyli, faleminderit, për të gjithë kontributin tuaj.
Erind Mërkuri, pedagogu këmbëngulës dhe pasionant par exellence i historisë të së drejtës dhe kushtetushmërisë, që investoi kohë, energji e përkushtim, pa asnjë interes financiar, por vetëm me pasionin e dashurisë për historinë, për të materializuar dokumentet arkivore në këtë botim. Këtu dua të falenderoj përzemërsisht misionin EU4Justice, që financoi botimin e këtij historiku, me një cilësi të shkëlqyer, e po vazhdon të na ndihmojë për ta sjellë edhe në gjuhën angleze./CNA





Lajmet e fundit nga