Risi në portalin e fermerit/ Pasqyrohen çmimet për produktet e peshkut

22 Gusht 2023, 21:45, Aktualitet CNA

Risi në portalin e fermerit/ Pasqyrohen çmimet për produktet e

Portali i fermerit që funksion prej 2 muajsh, duke orientuar fermerët me çmimet e përditshme të tregut për fruta-perimet, tashmë i janë shtuar çmimet edhe për produktet e peshkut.

Në portal çmimet ditore të shumicës jepen për 48 lloje produkte peshku për të gjitha tregjet e Shqipërisë. Çmimet jepen në lekë/kg.

Duke iu referuar të dhënave të portalit, çmimi me shumicë i aragostës është 7,000 lekë për kg. Ndërsa 1 kg levrek në tregun e shumicës në Sarandë dhe Gjirokastër kushton 800 lekë. Çmimi i peshkut kocë akuakulture në Sarandë dhe Gjirokastër është 750 lekë për kg, ndërsa në tregun e Shëngjinit peshku kocë i kategorisë së parë kushton 1,200 lekë për kg dhe i kategorisë së dytë 900 lekë për kg.

Çmimi i karkalecit të thellësisë së parë për tregjet Sarandë dhe Gjirokastër kushton 500 lekë për kg.

Çmimi i peshkut koran që rritet në ujërat e liqenit të Ohrit sipas portalit të fermerit kushton 2,000 lekë për kg me shumicë.

Në portalin e fermerit sqarohet se burimi i çmimeve të publikuara të produkteve të peshkut bazohet në çmimet ditore të referencës grumbulluar nga varkat e peshkimit dhe Organizatat e Menaxhimit të Peshkimit (OMP). Në rastin e kushteve të papërshtatshme për lundrim ose gjatë sezoneve të ndalimit, çmimet për disa ose për të gjitha produktet e peshkut nuk do të publikohen. Publikimi i çmimeve është informues.

Ministrja e Bujqësisë dhe Zhvillimit Rural Frida Krifca pohoi se portali është i aksesueshëm edhe si një aplikacion në platformat Google Play dhe në App Store nga ku mund të shkarkohet lehtësisht nga çdo pajisje celulari.

Nga ministria e Bujqësisë parashikohet të shtohen edhe çmimet për disa produkte të tjera bujqësore. Gjithashtu në portal ka filluar pasqyrimi i çmimit të grurit dhe misrit në bursat e huaja./Revista Monitor