Reforma Zgjedhore dhe Territoriale/ Ambasadori i OSBE-së në Pogradec: Të zgjidhet modeli më i mirë, nuk hyj në debat

21 Maj 2026, 12:44, Aktualitet CNA

Reforma Zgjedhore dhe Territoriale/ Ambasadori i OSBE-së në Pogradec:

Ambasadori i OSBE-së në Shqipëri, Michel Tarran, foli sot nga Pogradeci lidhur me Reformën Zgjedhore dhe atë Territoriale.

Tarran theksoi se OSBE është e angazhuar në mbështetjen e Komisionit të Posaçëm, që tani po punon për disa tematika me rëndësi.

“Prezenca e OSBE-së në Shqipëri është angazhuar në këtë punë për të mbështetur komisionin e posaçëm. Që nga fillimi kanë punuar ngadalë, kanë humbur kohë, por gëzohemi që kanë rifilluar punën e tyre. Dhe, siç e keni thënë, kanë punuar në temën e financimit të partive, që është një aspekt shumë i rëndësishëm i jetës politike në ndonjë vend demokratik, siç është tani Shqipëria”,-tha Tarran.

Sipas ambasadorit, ka modele të ndryshme për hartimin e kësaj reforme dhe çdo vend ka modelin e vet, ndërsa nënvizoi se në këtë proces duhet të merren në konsideratë edhe rekomandimet nga raportet e ndërkombëtarëve.

“Sa i përket reformës, ne nuk jemi këtu për të propozuar, për të punuar një model. Ka modele të ndryshme, çdo vend e ka modelin e vet. Dhe ka probleme të ndryshme me organizimin e zgjedhjeve, ka rekomandimet që bëhen nga ODIHR-i çdo herë kur vijnë këtu për të vëzhguar zgjedhjet. Ne jemi këtu për t'i ndihmuar në implementimin e këtij e këtyre rekomandimeve. Por, edhe njëherë, kjo nuk thotë që kemi një sistem të preferuar këtu. Edhe njëherë, ka sisteme të ndryshme. OSBE-ja bëhet nga 57 vende pjesëmarrëse dhe çdonjëri ka sistemin e tij, dhe duhet që shqiptarët vetë të vendosin cilin sistem kanë dëshirë për ta implementuar këtu”-deklaroi ambasadori.

I pyetur lidhur me hartën territoriale, Tarran u shpreh se deri më tani nuk është në dijeni për një hartë të re, teksa shtoi se është një debat që duhet të zgjidhet nga palët.

“Nuk jam i sigurt që do të shkoni me hartën e re territoriale, nuk e di, do të shikojmë, deri tani nuk kam dëgjuar që do të jetë gati një hartë e re, e di që dhe këtu mendime të ndryshme, nuk është puna ime që të hyj në këtë debat”,-tha Tarran./CNA