Prokurimet publike/ Muçollari: Përfituesit e tenderëve janë qeveritarët

20 Maj 2026, 20:14, Aktualitet CNA

Prokurimet publike/ Muçollari: Përfituesit e tenderëve

Anëtari i Kryesisë së Partisë Demokratike, Grigels Muçollari, ka deklaruar se transparenca, përdorimi i të dhënave të hapura dhe inteligjenca artificiale duhet të jenë pjesë kyçe e funksionimit të opozitës dhe programit qeverisës të së ardhmes.

Muçollari ka theksuar nevojën për krijimin e një platforme që i jep publikut akses në të dhëna dhe mundëson verifikimin e informacionit, duke e konsideruar këtë si një instrument të rëndësishëm për rritjen e llogaridhënies.

Ai u ndal edhe te sistemi i prokurimeve publike, duke deklaruar se në vend ekzistojnë mijëra procedura të shënuara me “flamur të kuq”, të cilat sipas tij tregojnë mungesë konkurrence ose favorizime në tendera. Muçollari pretendoi se në disa raste përfituesit e kontratave publike janë të lidhur me zyrtarë apo figura politike.

Në fjalën e tij, ai kritikoi mënyrën se si, sipas tij, inteligjenca artificiale është përdorur nga qeveria, duke e cilësuar më shumë si mjet propagande sesa si instrument real për përmirësimin e shërbimeve publike. Ai përmendi gjithashtu edhe prokurimet në fushën e teknologjisë dhe sistemet e klasifikuara.

“Një sistemi i prokurimeve publike që është ndërtuar prej më shumë se një dekade përpara, në qeverisjen e Partisë Demokratike, i cili rezultoi si një instrument shumë i mirë për të kufizuar korrupsionin dhe mënyrën se si bëheshin prokurimet publike.

Sot, po të futemi në këtë sistem, vëmë re që ka mijëra prokurime publike, të cilat identifikohen me flamur të kuq. Ç'do të thotë me flamur të kuq? Do të thotë që ose është një konkurrent i vetëm, që do të thotë kriteret janë kopësitur vetëm për atë konkurrent, ose janë përjashtuar të gjithë konkurrentët e tjerë.

Dhe në shumicën e rasteve, kompanitë të cilat kanë përfituar janë njerëz të lidhur me deputetë, me drejtorë, me qeveritarë të kësaj qeverie. Pasi këtu nuk është një rast e dy, se do të ishte shumë kollaj të flisnim për një rast e dy, por janë mijëra raste. Kështu që një instrument shumë i mirë për t'ia pasqyruar publikut këto", tha Muçollari./ CNA