Rama-protestuesve: Ju në kor me robt e shtëpisë sime, unë në krye të punëve të Shqipërisë

2 Qershor 2026, 15:49, Aktualitet CNA

Rama-protestuesve: Ju në kor me robt e shtëpisë sime, unë

Kryeministri Edi Rama ka vijuar me replikat ndaj protestuesve për thirrjet që bëhen prej dy ditësh në tubimet para Kryeministrisë.

Rama shkruan se është gati për t’i dëgjuar nëse duan të flasin për Zvërnecin, transparencën, pronat dhe çdo çështje tjetër me interes publik. Por thekson se në këtë çështje nuk duhet të përfshihen familjarët.

Në reagimin e tij, kryeministri ka ironizuar edhe opozitën, ku i ka cilësuar si "mbeturina politike".

Ai shprehet më tej se është i gatshëm të zhvillojë një bashkëbisedim publik me një përfaqësi prej 20 vetash të protestuesve.

Ndër të tjera, ai thekson se do të vijojë të jetë në krye të punëve të Shqipërisë për integrimin e vendit në Bashkimin Europian brenda vitit 2030.

Postimi i plotë:

Çuna

Unë sinqerisht ju pëlqej vërtetë, sidomos ata ndër ju që votojnë për mua - ka plot aty jashtë këtij korit udhëheqës - dhe mbi të gjitha, sepse të paktën jeni më të freskët se sa mbeturinat politike që më vijnë poshtë dritares tash 13 vjet, por nëse ky është vizioni juaj për mbrojtjen e natyrës dhe për “Shqipërinë e Shqiptarëve”, ju uroj sinqerisht shumë fat në të ardhmen, sepse do t’ju duhet.

Deri atëherë, mua këtu më keni, gjithmonë gati për t’ju dëgjuar, nëse doni të flasim për Zvërnecin, për arrogancën, për dhunën, për mosinformimin, për transparencën, për pronat, për investimet e huaja, për natyrën, flamingot, shqiponjat, apo për çdo çështje tjetër me interes publik.

Sepse robt e shtëpive tona janë interes privat dhe të tillë duhet të mbeten them unë apo jo?

Po që kjo imja të mos mbetet thjesht si një “larje goje” në mexhelis apo largqoftë te merret si tallje me ju, mblidhuni, jo më shumë se 20 vetë dhe bujrum, ulemi në një bashkëbisedim publik, ku të doni dhe kur të doni.

Nëse doni, natyrisht.

Se po nuk deshët, prapë i kemi punët tona te ndara:

ju në kor me robt e shtëpisë time,

unë në krye të punëve të Shqipërisë, me votën e shqiptarëve, për Shqipërinë 2030 në Bashkimin Europian. /CNA