Rama fyeu fëmijët e spektrit autik/ Psikologia Sinani për CNA: Të mos keqpërdoren termat për qëllime vetjake!

23 Prill 2025, 09:25, Aktualitet CNA

Rama fyeu fëmijët e spektrit autik/ Psikologia Sinani për CNA:

Kryeministri Edi Rama, gjatë një takimi elektoral ditën e martë fyeu personat me aftësi të veçanta, ndërsa përdori termin “politikisht autik”. Psikologia klinike, Lumturi Sinani, në një reagim për CNA, është shprehur e indinjuar për mënyrën se si abuzohet me termat që kanë të bëjnë me shëndetin mendor.

Sinani theksoi se nga figurat e larta të shtetit presim të jenë mbështetje për personat me aftësi të veçanta dhe jo të abuzojnë me termat për të arritur qëllimet e tyre.

“Është për të ardhur keq që në shoqërinë tonë shqiptare abuzohet me termat që kanë të bëjnë me shëndetin mendor. Askush nuk ka të drejtë të etiketojë apo të vlerësojë një person, një grup njerëzish, nëse vuan nga autizmi apo jo. Kjo u takon institucioneve përkatëse dhe profesionistëve të shëndetit mendor. Personat autikë janë unikë dhe me shumë aftësi, ku me mbështetjen e duhur arrijnë pavarësinë e tyre. Ne presim që qeveritarët, figurat e larta të shtetit, të jenë mbështetje për ta dhe jo të abuzojnë me këtë term për të arritur qëllimin e tyre. Është e papëlqyeshme të keqpërdorësh termat e shëndetit mendor për të fituar apo për të arritur atë që do. Askush nuk e ka këtë të drejtë. Si profesioniste e shëndetit mendor indinjohem kur dëgjoj deklarata apo etiketime të tilla. Pasi kjo është si një goditje e dytë për individët që e mbartin këtë, por edhe për familjarët e tyre”, tha psikologia.

Rama fyeu fëmijët e spektrit autik/ Psikologia Sinani për CNA:

Psikologia Lumturi Sinani shtoi se fokusi duhet të vendoset te ndihma që qeveria ka dhënë për fëmijët me aftësi ndryshe dhe të ketë sa më shumë fushata ndërgjegjësuese.

“Qeveria shihet si një institucion që i vjen në ndihmë shoqërisë sonë në çdo aspekt. Por sa janë ndihmuar fëmijët që vuajnë nga autizmi? A kanë këta fëmijë mësues ndihmës në shkolla? A mbështeten familjarët e tyre? Këto pika sigurisht dhe të tjera duhet të diskutohen dhe vlerësohen. Fushata ndërgjegjësuese sa më shumë për popullatën janë të nevojshme.

Ndërsa detyra jonë më e rëndësishme si shoqëri është që këta fëmijë të ndihen të pranuar dhe të dëshiruar. T’u falim dashurinë dhe përkushtimin e duhur. Përfshirja e tyre në aktivitete, pranimi i tyre në ambientet gjithëpërfshirëse do të ishte një ndihmë shumë e madhe për ta”, tha psikologia.

Në përfundim, Sinani tha se figurat e larta janë të parët që duhet të japin mesazhet e duhura, pasi shoqëria është lehtësisht e ndikueshme nga diskursi i tyre.

“T'i dëgjosh këto deklarata nga qeveritarë të shtetit ta 'vrasin shumë veshin' sepse zëri i tyre dëgjohet nga të gjithë. Ne pretendojmë që ata të jenë shembuj për të rinjtë, për fëmijët, për një ardhmëri sa më të mirë për vendin tonë. Si presim ne të zhvillohet shoqëria apo mentaliteti kur vetë qeveritarët nuk janë një ndihmë. Shoqëria jonë është lehtësisht e ndikueshme sidomos nga figurat e larta dhe me pozitë, prandaj duhet treguar shumë kujdes mbi etiketimet, termat e keqpërdorur dhe mesazhet që përcillen”, tha psikologia.

Kujtojmë se vetë kryeministri Edi Rama ditën e martë pas deklaratës bëri “Mea Culpa”, duke thënë se përdori termin e gabuar, ndërsa pranoi se ka cenuar fëmijët autikë dhe ka lënduar prindërit e tyre./ CNA