E fundit!

09:44 Politikë

Vrasja e efektivit në Maliq/ Rama: Nderime përjetë dëshmorit, ndëshkim maksimal për autorin

Kryeministri Edi Rama ka reaguar pak minuta më parë lidhur...

Qeveria hap konkursin/ Në ish-zonën ushtarake të Farkës do ndërtohet Qendër Ekspozitash dhe hotelesh

5 Janar 2024, 16:53, Aktualitet CNA

Qeveria hap konkursin/ Në ish-zonën ushtarake të Farkës do

Në ish-zonën ushtarake të Farkës në Tiranë, do të ndërtohet një qendër multifunksionale.

Konkretisht qendra do të zërë një sipërfaqe prej 6 hektarësh, të përdorur si zonë parkimi për helikopterë.

Kjo vendodhje konsiderohet një nyje e rëndësishme, pasi gjendet përgjatë unazës së jashtme të Tiranës, me një lidhje të shpejtë me aeroportin, Korridorin Blu (korridori Adriatiko-Jonian që lidh Malin e Zi, Shqipërinë dhe Greqinë), Korridorin VIII (rruga Egnatia) si dhe Portin e Durrësit.

Tashmë në këtë zonë, qeveria ka planifikuar të ndërtojë qendrën “Expo Albania”.

Agjencia Kombëtare të Planifikimit të Territorit ka çelur në fund të muajit dhjetor konkursin ndërkombëtar mbi idetë e projektimit.

“Agjencia Kombëtare e Planifikimit të Territorit është Autoriteti Organizues i procesit të konkursit, i cili do të zhvillohet në zbatim të Vendimit të Këshillit të Ministrave Nr. 512, datë 30.08.2023 “Për ngarkimin e Agjencisë Kombëtare të Planifikimit të Territorit si organ qendror blerës për realizimin e konkursit të projektimit për projektidetë e zhvillimit të Tirana Expo, dhe për një shtesë fondi në buxhetin e Agjencisë Kombëtare të Planifikimit të Territorit, miratuar për vitin 2023” dhe në përputhje me rregullat dhe procedurat e përcaktuara në ligjin shqiptar për prokurimet publike”, thuhet në shpalljen e AKPT-së.

Konkursi ka dy faza, e para është e aplikimit, ku kandidatët do të paraqesin përbërjen e ekipit, kualifikimet, metodologjinë e punës, si dhe deklaratën e vizionit të tyre për sitin, duke përfshirë një përmbledhje të konceptit paraprak.

Në fazën 2, Juria do të shqyrtojë me kujdes propozimet e ekipeve të përzgjedhura dhe, bazuar në kriteret e fazës 2, do të përzgjedhë propozimin fitues.

Në ish-zonën ushtarake të Farkës do të ndërtohen hapësira të dedikuara për evenimente, panaire, koncerte, takime, si dhe hotele me 3 apo 4 yje.

Gjithashtu, Qendra do të përfshijë disa salla ekspozimi, konferencash dhe mbledhjeje, auditorë si dhe të gjitha hapësirat e nevojshme mbështetëse, teknike dhe të magazinimit.

“Duhet të projektohet për të qenë e gatshme të akomodojë ekspozita, panaire dhe evenimente që mbulojnë një gamë të gjerë sektorësh, si: ai i ndërtesave, ndërtimit, inxhinierisë, prodhimit, pasurive të paluajtshme, menaxhimit, shëndetit, mjekësisë dhe farmaceutikës, shtëpive, kopshteve, dhuratave, kozmetikës, bukurisë, të dhënave, IT dhe teknologjisë, energjisë, automobilistikës, transportit, medias dhe kontentit, kulturës ‘pop’, lojërave elektronike, shtypshkrimit dhe paketimit, sigurisë dhe mbrojtjes, sportit dhe mirëqenies, udhëtimit dhe turizmit”, theksohet ndër të tjera në dokument.