Ndërron jetë ish-deputeti i PD-së

4 Mars 2026, 13:50, Aktualitet CNA

Është ndarë nga jeta në moshën 96-vjeçare Tomor Dosti, ish-deputet dhe ish-nënkryetar i Partisë Demokratike të Shqipërisë, një nga figurat e njohura të së djathtës shqiptare në vitet e para të pluralizmit.

Tomor Dosti lindi në Gjirokastër në vitin 1930. Jeta e tij u shënua herët nga përndjekja politike. Pas arratisjes së babait dhe vëllait, familja e tij u përball me represionin e regjimit komunist.

Në vitin 1953 u arrestua dhe u dënua fillimisht me 20 vjet heqje lirie për “tentativë arratisjeje”, dënim që më pas iu rëndua në 25 vjet burg. Vuajti dënimin në burgun e Burrelit, mes shumë personaliteteve të njohura të Shqipërisë së asaj kohe. Pas daljes nga burgu, familja e tij kaloi vite të tëra internimi.

Me rrëzimin e regjimit komunist, në vitin 1991, Dosti iu bashkua Partisë Demokratike të Shqipërisë, duke kontribuuar në ndërtimin e profilit të saj të djathtë në jug të vendit. Së bashku me Pjetër Arbnorin, Leka Totën, Uran Butkën dhe Ajet Rusin, ai ndihmoi në konsolidimin e frymës antikomuniste dhe të moralitetit kombëtar në partinë e re.

Në vitet e para të pluralizmit ishte nënkryetar i PD-së dhe u zgjodh deputet në dy legjislatura radhazi, nga viti 1991 deri në vitin 1996. Në vitin 1998 u tërhoq nga politika aktive.

Tomor Dosti do të kujtohet si një figurë që përjetoi persekutimin e regjimit komunist dhe më pas u angazhua në jetën politike të vendit në periudhën e tranzicionit demokratik.

Ndërron jetë ish-deputeti i PD-së

Për lajmin e hidhur ka reaguar edhe deputeti i PD-së, Belind Këlliçi, duke theksuar se Dosti dha kontribute të vyera për skenën politike.

“Ndarja nga jeta e Tomor Dostit është një lajm i hidhur për të afërmit, familjarët të gjithë ata që e njhnin dhe në veçanti për demokratët.

Dy herë deputet dhe nënkryetar i PD për një periudhë, Dosti solli kontribute të vyera për skenën politike.

Për më tepër, ai vetë ishte dëshmia e krimeve dhe persekutimit që regjimi komunist i bëri elitave e familjeve të mëdha të vendit.

Dosti u dënua dhe vuajti burgun në Burrel, e më tej internim të gjatë bashkë me të afërmit.

Me ardhjen e lirisë, ai mori vendin që i takonte duke u aktivizuar për ato vlera e parime që shqiptarët kërkonin e aspironin.

U prehtë në paqe, i përjetshëm kujtimi i tij”, shkruan Këlliçi./ CNA