Ikja drejt Amerikës, njohja me Atë Liolinin dhe studimet në Boston/ Kryepiskop Joani rrëfen jetën e tij

26 Mars 2025, 21:57, Aktualitet CNA

Ikja drejt Amerikës, njohja me Atë Liolinin dhe studimet në

Kryepiskopi i Tiranës, Durrësit dhe gjithë Shqipërisë, Fortlumturia e Tij Joani ka treguar se si ka udhëtuar drejt Amerikës, studimet që kreu atje dhe njohjen me Atë Artur Liolinin.

Fortlumturia e Tij Joani ka rrëfyer se së bashku me nunin e tij, Petro Zhejin pas hapjes së ambasadave, në vitin 1990 shkuan në Itali. Në ambasadën amerikane në Itali, Fortlumturia e Tij dhe Petro Zheji morën vizë për në Amerikë e më pas përtej oqeanit u pajisën me Kartën Jeshile.

Kryepiskop Joani tregon se në Amerikë kontaktoi me Atë Artur Liolinin, udhëheqësin e Ksihës Ortodokse të shqiptarëve në Boston, i cili e ndihmoi që të merrte një bursë studimi nga Kryepeshkopata shqiptare e Amerikës.

“Në vitin 1990, pas hapjes së ambasadave, u lejua të mernim pasaportat dhe shkova në Itali, së bashku me Petro Zhejin dhe një kushëririn e tij. Atje u pranuam si refugjatë dhe morëm vizë në ambasadën amerikane. Në Amerikë na u dha Karta jeshile (Green Card). Atje kontaktova Atë Artur Liolinin, i cili më ndihmoi që Kryepeshkopata shqiptare e Amerikës të më jepte një bursë studimi, nga një fondacion i krijuar në kujtim të Imzot Theofan Nolit. Në Amerikë, për kishat ortodokse, janë dy shkolla të rëndësishme teologjike: Holy Cross Greek Orthodox School of Theology (Shkolla Teologjike Ortodokse Greke e Kryqit të Nderuar) në Boston, nën juridiksionin e Patriarkanës Ekumenike dhe Saint Vladimir's Orthodox Theological Seminary (Seminari Teologjik Ortodoks i Shën Vladimirit) në Neë York, nën juridiksionin e OCA (Kisha Ortodokse e Amerikës). Meqenëse Kryepeshkopata Shqiptare e Amerikës e ka qendrën në Boston, studiova në atë qytet”, u shpreh Kryepiskop Joani.

Fortlumturia e tij Joani në intervistën e dhënë ka bërë dhe një përmbledhje të cikleve të studimeve që ka kryer në Boston, qytet ku ka qendrën Kryepeshkopata Shqiptare e Amerikës.

“Në Boston, u diplomova me “High Distinction” në MTS (Master i Studimeve Teologjike) në vitin 1993. Në 1995 shkova përsëri për të ndjekur studime të mëtejshme në Universitetin “Holy Cross Greek Orthodox School of Theology” në Boston. Në vitin 1997 u diplomova me “High Distinction” në MT (Master i Teologjisë, një master i avancuar, ekuivalent me kandidat i shkencave) po në Holy Cross, Boston”, tha Fortlumturia e Tij./ CNA