Hakerimi i institucioneve/ Çela: I gjithë sistemi i Iranit paska bërë “luftë” me pesë IT, qesharake

30 Nëntor 2022, 13:16, Aktualitet CNA

Hakerimi i institucioneve/ Çela: I gjithë sistemi i Iranit paska

Prokuroria e Tiranës, ka njoftuar sot se ka lëshuar 5 urdhër-arreste për sulmet kibernetike të kryera nga Irani ndaj vendit tonë.

5 IT-të, që akuzohen për shpërdorim detyre, janë lënë nga Gjykata në arrest shtëpie.

Kjo situatë është komentuar nga analisti Erlis Çela.

Sipas tij është tejet qesharake të kërkohet llogari pesë IT të administratës, teksa përgjegjësia këtu është totalisht politike.

“Nuk besoj se është përgjegjësia kryesore te 5 specialistë të IT, të administratës publike. Unë jam më shumë i fokusuar te përgjegjësia politike në këtë histori dhe nuk jam në gjendje të dije dosjen hetimore të prokurorisë se si ka arritur të shkojë te këta pesë persona.

Për mua është më shumë të dimë se cila është përgjegjësia politike, sepse ne jemi mësuar me idenë që askush nuk mban përgjegjësi politike, mosndëshkueshmëri dhe meqë nuk mban asnjëherë kryeministri, ministri i brendshëm apo ministra të tjerë, atëherë duket sikur në mënyrë të pavullnetshme orientohemi te njerëz të niveleve më të ulëta të cilët duhet mbajtur përgjegjësi.

Kur në fakt e gjithë historia është një përgjegjësi totalisht politike.

Këtu kryeministri fillimisht tha hakerat nuk ia dolën, me pas gradualisht qëndrimet publike erdhën duke u zbutur, por nuk u morën me gjërat tjera. Këtu kemi të bëjmë me një qëndrim joserioz, kjo është qesharake.

Është bërë diçka është, sa janë etiketuar disa njerëz, dhe historia mbyllet ashtu siç, u bë më parë me disa patronazhistë. Duhet kërkuar përgjegjësia dhe llogaria te qeveria, dhe tani e diskutojmë e kanë fajin apo jo pesë specialistë, kjo do të ishte një tallje.

Kjo është me e rëndësishme sesa fakti se u gjetën pesë veta, do të ishte qesharake, që i gjithë sistemi i Iranit paska bërë luftë me pesë IT të administratës publike, këtë nuk ke nga e kap më”, ka thënë Çela në "MCN Live"./CNA.al