Hakerimi i e-maileve të SPAK-ut/ Kalon për gjykim çështja e Agim Ismailit, Zambak Gjonit dhe Arnold Rrokajt

6 Mars 2026, 16:06, Aktualitet CNA

Hakerimi i e-maileve të SPAK-ut/ Kalon për gjykim çështja

Gjykata e Posaçme ka kaluar për gjykim çështjen e hakerimit të sistemit të SPAK-ut.

Të pandehur për këtë çështje janë ish-drejtori i Burgjeve, Agim Ismaili, Zambak Gjoni dhe Arnold Rrokaj.

Ndaj tyre rëndon akuza për grup të strukturuar kriminal.

Për këtë ngjarje u arrestuan dy persona, Zambak Gjoni dhe Arnold Rrokaj.

Ismaili dhe nipi i tij kanë pasur komunikime me personat e arrestuar. Për më tepër Ismaili dyshohet se është njeriu që i koordinonte.

Gjithashtu në telefonat e personave të ndaluar u gjetën edhe të dhënat që i janë dërguar Agim Ismailit.

Një person tjetër që është thirrur nga SPAK-u më parë është shtetasi Dritan Palnikaj.

Dritan Palnikaj ishte sekretar i Ministrisë së Brendshme, ku ministër ka qenë Fatmir Xhafaj, dhe është nipi i Agim Ismailit.

Ismaili akuzohet për veprat penale “Përgjimi i paligjshëm i të dhënave kompjuterike”, të kryer në formën e posaçme të bashkëpunimit, atë të grupit të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”.

Kujtojmë se në janar SPAK-u mbylli hetimet dhe dërgoi për gjykim Ismailin, ish-punonjësin e IMT-së, Arnold Rrokajn dhe ish-zyrtarin e burgut të Vlorës, Zambak Gjonin.

NJOFTIMI:

1. Prokuroria e Posaçme kundër Korrupsionit dhe Krimit të Organizuar me datë 13.01.2026 ka paraqitur pranë Gjykatës kërkesën me objekt: “Dërgimin në gjyq të çështjes penale që i përket procedimit penal Nr. 277/1/1, të vitit 2025, në ngarkim të të pandehurve Arnold Rrokaj, Zambak Gjoni dhe Agim Ismaili”.

2. Në seancën e datës 06.03.2026 (seanca paraprake), Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtari Paulin Çera, pasi shqyrtoi pretendimet e palëve, bazuar në nenet 328, 329, 331, 332, 332/a, 332/b, 332/dh, 332/e, 332/ë, 332/g dhe 332/gj të K.Pr.Penale, me vendimin nr. 65, datë 06.03.2026, vendosi:

1. Pranimin e kërkesës së Prokurorisë së Posaçme kundër Korrupsionit dhe Krimit të Organizuar.

2. Dërgimin në gjyq të çështjes penale që i përket procedimit penal Nr. 277/1/1, të vitit 2025, në ngarkim të të pandehurve Arnold Rrokaj, akuzuar për veprat penale “Hyrja e paautorizuar kompjuterike”, paragrafi i dytë dhe “Përgjimi i paligjshëm i të dhënave kompjuterike”, paragrafi i dytë, të kryer në formën e posaçme të bashkëpunimit atë grupit të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, të parashikuara nga nenet 192/b paragrafi 2, 293/a paragrafi 2, 28/4, 333/a dhe 334 të Kodit Penal; Zambak Gjoni, akuzuar për veprat penale “Përgjimi i paligjshëm i të dhënave kompjuterike”, paragrafi i dytë, të kryer në formën e posaçme të bashkëpunimit, atë të grupit të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, të parashikuara nga nenet 293/a paragrafi 2, 28/4, 333/a dhe 334 të Kodit Penal, së bashku me kërkesën e tyre për të proceduar me gjykim të shkurtuar; si dhe të pandehurit Agim Ismaili, akuzuar për veprat penale “Përgjimi i paligjshëm i të dhënave kompjuterike”, paragrafi i dytë, të kryer në formën e posaçme të bashkëpunimit, atë të grupit të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, të parashikuara nga nenet 293/a paragrafi 2, 28/4, 333/a dhe 334 të Kodit Penal, për të proceduar me gjykim të zakonshëm. Rruga “Jordan Misja” Nr.1, 1057 Tiranë; tel/fax 0035542231527; gjykata.gov.al

3. Dërgimin e çështjes për gjykim pranë Gjykatës së Posaçme të Shkallës së Parë për Korrupsionin dhe Krimin e Organizuar, për t’u hedhur në short për gjykimin e themelit, e cila do të përbëhet nga tre gjyqtar.

4. Kundër këtij vendimi nuk lejohet ankim./CNA