GJKKO kaloi dosjen për gjykim/ Ilir Meta reagon nga burgu: Sot u shënua edhe "një risi"

18 Mars 2026, 12:48, Aktualitet CNA

GJKKO kaloi dosjen për gjykim/ Ilir Meta reagon nga burgu: Sot u

Kreu i Partisë së Lirisë, Ilir Meta, ka reaguar nga burgu lidhur me vendimin e GJKKO-së për të kaluar çështjen për gjykim.

Meta e cilësoi vendimin si politik, ndërsa shtoi se tani nuk do të ketë vetëm gjykim, por paralelisht edhe hetim.

Ndër të tjera shton se përfundimi i seancës paraprake, do të mundësojë atë që ai e cilëson “çmontimi i gënjeshtrave në fashikujt e dosjes”.

Postimi i plotë:

Drejtësi me Regji dhe gjykim “me risi”.

Dihet se e gjithë Ramaforma ishte një Drejtësi me Regji, për të shtuar korrupsionin në përmasa skizofrenike në Shqipëri, siç e provoi edhe raporti i Transparency International, që faktoi përkeqësimin me 11 vende, krahasuar me një vit më parë.

Sot u shënua edhe një gjykim “me risi”.

Edhe pse gjykatësja konstatoi drejtësinë e shumë pretendimeve tona, me mungesën e qëllimshme të veprimeve hetimore nga akuza për moszbardhjen e së vërtetës, në vend që të kërkonte që të bëheshin këto hetime të domosdoshme, por të shmangura qëllimisht deri tani, vendosi që çështja të kalojë në gjykim, por edhe listoi të gjitha veprimet hetimore, që duhen bërë njëkohësisht për zbardhjen e së vërtetës.

Pra tani nuk do të kemi vetëm gjykim por paralelisht edhe hetim.

Sidoqoftë, duke shprehur keqardhjen që humbëm 6 muaj kohë, edhe pse u dokumentuan shumë gënjeshtra të akuzës gjatë këtij procesi, mezi presim fillimin e gjykimit në themel dhe i ftoj të gjithë gazetarët dhe të gjithë trupin diplomatik në Tiranë që të ndjekin çdo seancë.

Përfundimi i seancës paraprake na jep lirinë që të çmontojmë publikisht të gjitha gënjeshtrat, falsifikimet dhe mashtrimet që ndodhen në fashikuj.

Falenderoj dy avokatët e mi, Kujtim Cakrani dhe Gylsen Zhllima për punën e tyre dhe për pranimin e të gjithë provave të reja nga gjykata, të paraqitura prej tyre, të cilat prokurorët i kishin shmangur qëllimisht.

I paçuditur nga bllokimi recidivist i integrimit europian nga Edi Rama, i cili ka tmerr edhe nga drejtësia e tij.

Gjykata e Posaçme ka kaluar për gjykim dosjen për kreun e PL-së, Ilir Meta, ish-deputeten Monika Kryemadhi dhe të pandehurit e tjerë. SPAK-u kishte mbyllur hetimet më 28 korrik të vitit të kaluar dhe çështjen e dërgoi në gjykatë në fund të gushtit.

Dosja përfshin hetime të lidhura me çështjen "CEZ-DIA", lobimin e LSI-së në Shtetet e Bashkuara dhe pasurinë e të pandehurve. Nga pesë të pandehurit, vetëm Ilir Meta ndodhet në burg që prej tetorit 2024. Të gjitha kërkesat e tij për ndryshim të masës së sigurisë janë rrëzuar. /CNA