“Doktoresha më sfidon”/ Arian Galdini replika me mjeken e Onkologjikut

10 Korrik 2024, 21:57, Aktualitet CNA

“Doktoresha më sfidon”/ Arian Galdini replika me mjeken e

Kreu i LRE, Arian Galdini

Kreu i LRE, Arian Galdini ka reaguar pas replikave në rrjetet sociale me mjeken e Onkologjikut Alketa Ymeri Pere, e cila është në hetim nga SPAK, pas skandalit që shpërtheu tek Spitali i Onkologjikut ku mjekët shisnin medikamentet e kimioterapisë dhe drejtonin pacientët në spitalet private.

Galdini shkruan se doktoresha duket se është patronazhiste partie pasi hynte në komente dhe i drejtohej me fyerja dhe sharje dhe nga ana tjetër mbronte drejtuesit e QSUT, Ministrisë së Shëndetësisë dhe Edi Ramën.

Galdini thekson se kjo shkon përtej pacipësisë që edhe pse e përfshirë në skandal, mjekja komenton në këtë mënyrë me njeriun që denoncoi skandalin tek Onkologjiku vite më parë.

Reagimi i Arian Galdinit

Doktoresha më sfidon. Brenda pak ditësh, kjo bëhet doktoresha e dytë që më sfidon.

E para punon tek Neorologjiku dhe dukej qartë që ishte Patronazhiste Partie sepse hynte me komente të ulëta e më shante e fyente mua dhe hidhej në zjarr me komente në mbrojtje të Drejtuesve të QSUT, Ministrisë së Shëndetësisë dhe të Edi Ramës.

Sot hyn dora vetë Doktoresha e Famshme e Onkologjikut.

Ç’ti them unë kësaj? Ç’ti përgjigjem unë kësaj.

Sinqerisht që mendohem mirë dhe gjatë para se t’i them a shkruaj diçka sepse e shoh fillimisht si nënë e familjare e ndjej keqardhje për të.

Veç kur e mendoj si “intelektuale” dhe si “mjeke” nuk mund të hezitoj t’ia shpreh haptazi neverinë time.

Është e tmerrshme ta lexosh që “doktoresha dora vetë” e skandalit tek Onkologjiku, vjen e komenton në Faqen time duke e ditur mirë se unë jam Arian Galdini, njeriu që në 2015 ka denoncuar të tilla skandale të ngjashme tek Onkologjiku dhe madje kudo e ngado në sistemin shëndetësor shqiptar.

Ta lexosh sesi shkruan e komenton kjo Doktoresha, pas atyre përgjimeve që ne të gjithë lexuam, e pas daljes në dritë të aq shumë pronave e pasurive të vëna nga njerëz të paskrupull që përdorin “bluzën e bardhë” për t’i vjedhur hallin pacientëve të tyre e për t’u shitur vdekjen e shpërfilljen, është përtej pacipësisë.

Nuk dua të merrem me këtë doktoreshën si person, sepse nuk dua fare as ta bëjë të ndihet protagoniste e as si viktimë.

Ama, kur këta “intelektualët”, “bluzat e bardha”, si kjo janë kaq të pacipë e të pamend sa vijnë e shënojnë emrin aty ku askush nuk i ka thirrur me emër, nuk mund të rri pa e ngritur zërin.

A e kuptoni vallë se qytetari shqiptar është qytetari më i tradhëtuar në botë? Na ka tradhëtuar Qeveria, na kanë tradhëtuar Deputetët, na kanë tradhëtuar Kryetarët e Bashkive.

Të gjithë këta janë aty lart me votat tona e paguhen me taksat tona e na grabisin e plaçkisin pamëshirshëm deri në atë pikë sa kemi mbërritur tek kjo ditë kur Shqipërisë i ikin 6 shqiptarë në orë.

Tradhëtinë na e bëjnë edhe më të padurueshme edhe këta që ne u kemi besuar shkollat, shëndetin, kulturën, sigurinë, taksat, pushtetin, etj, etj.

Madje është e paimagjinueshme që këta që na kanë tradhëtuar, e na plaçkisin, kanë edhe guximin e kurajon marroke që të vijnë e të na kërkojnë llogari neve që përpiqemi të kërkojmë e flasim të vërtetën. Kemi arritur në epokën e pacipësisë.

Ne qytetarët çojmë në mirëbesim, fëmijët tanë në shkolla, dhe mësojmë se Drejtoresha e shkollës Qemal Stafa në Tiranë shet viza, e Drejtori i shkollës artistike Jan Kukuzeli në Durrës u shet drogë fëmijëve tanë.

Ne shkojmë në mirëbesim në spitale e qendra shëndetësore, e na trajtojnë si plotësues ëndrrash për pushime në Maldive a Tajlandë.

Shkojmë në Polici, e Shefa Komisariatesh apo Drejtorë Policie na shesin tek Grupet Kriminale, e më keq akoma, kapen në Sky Encrochat duke porositur vrasje, gjobëvënie, rrëmbime apo pengmarrje njerëzish.

Kështu grupe të tilla të strukturuara grabitqare shohim tek Bashkia e Tiranës me 5 D, tek Inceneratorët, tek ARRSH, etj, etj, etj…

Atëherë si mund ta tolerojmë këtë epokë pacipësie të na shndërrohet në normalitet?

Unë e refuzoj këtë Rilindje të Pacipësisë. Stop Epokës dhe Rilindjes së Pacipësisë. Pikë./ CNA