Bojkoti i seancave gjyqësore për 5 ditë/ Neza: Rasti i parë në Shqipëri që ndodh një protestë e tillë

20 Tetor 2025, 19:18, Aktualitet CNA

Bojkoti i seancave gjyqësore për 5 ditë/ Neza: Rasti i parë

Gazetari Sami Neza është shprehur mbrëmjen e sotme se çështja e gjyqtares Irena Gjoka ka dobësuar besimin te drejtësia. I ftuar në Syri Tv, Neza tha se kjo ka ndodhur për shkak se janë disa institucione që duhet të verifikonin akuzat ndaj saj. Gazetari u shpreh se sistemi gjyqësor në tërësi është i përfshirë në problematika të mëdha.

"Çfarë i ka bërë besimit tek drejtësia çështja ‘Gjoka’, nuk i ka bërë asnjë precedent tjetër në historinë e gjyqësorit, për shkak se ne kemi të përfshirë disa institucione që duhet të merreshin me verifikimin e akuzave që janë bërë ndaj saj dhe ndërkohë kemi një bllokim të verifikimit në interes të disa objektivave që kanë nisur si objektiv politik dhe kërkohen të zbatohen përmes gjyqësorit që është sërish një problematikë tjetër e madhe kur mendojmë që gjyqësori duhet të jetë tërësisht i ndarë nga politika.

I gjithë gjyqësori është përfshirë në problematika shumë të mëdha. Problematika të cilat kanë të bëjnë me integritetin... për shembull, rasti i Elbasanit ka të bëjë me integritetin e palëve në proces. Integriteti i palëve në proces është A-ja, kur nis një proces gjyqësor dhe baza në të cilën gjykohet nëse ky proces është i drejtë apo jo. Në momentin që cënohet ky integritet, nuk i ka mbetur më asgjë gjyqtarit, ose çfarëdo lloj vendimi të japë gjyqtari është i paragjykuar.", tha gazetari.

Neza komentoi edhe bojkotin e proceseve gjyqësore për 5 ditë nga Dhoma e Avokatisë, ku tha se është rasti i parë që në vendin tonë ndodh kjo lloj “proteste”.

"Protesta e avokatëve me 5 ditë për të mos marrë pjesë në të gjitha proceset gjyqësore, është rasti i parë në Shqipëri që ndodh një protestë e tillë. Ne jemi soditës të pushtetit gjyqësor dhe ne nuk e ndjejmë siç e ndjejnë grupet e interesit që punojnë brenda këtij pushteti. Por fakti që ata u detyruan që të bëjnë 5 ditë grevë, ndërkohë që ne kemi një stok çështjesh prej 140 mijë çështjesh, do të thotë që për një javë janë vonuar të paktën mbi 1 mijë procese gjyqësore me nga një seancë. Mendoni se çfarë lloj impakti është ky dhe kush e injektoi këtë lloj iniciative. E injektoi cënimi i integritetit të palëve në një proces gjyqësor, që është një gjë që mezi perceptohet nga publiku, por është një gjë shumë e rëndësishme për ata që përfshihen në këtë proces", u shpreh ai. /CNA