E fundit!

09:27 Kronika

E rëndë në Korçë, 66-vjeçari i jep fund jetës

Rreth orës 08:40, në lagjen nr. 10, Korçë, një automjet ti...

10 orë debat, Balluku përballon e vetme opozitat në Kuvend

25 Nëntor 2022, 09:57, Aktualitet CNA

Në një seancë maratonë, ashtu siç edhe pritej, për diskutimin e një prej temave më të nxehta të momentit, projektit të Portit të Durrësit, debatet në Kuvend kanë qenë të ndezura dhe shpesh të shoqëruara me akuza e kundërakuza, me replika e kundëreplika.

Protagoniste në 10 orët e diskutimeve zv.kryeministrja Balluku, e cila është përplasur me pothuajse të gjithë deputetët më të ashpër të opozitës, si nga krahu i Berishës ashtu edhe nga ai i Alibeajt.

E përforcuar me shumë argumente teknike lidhur me projektin, edhe për shkak edhe të rolit të saj si propozuese e këtij projekti, Balluku i është përgjigjur debatit në të gjitha nivelet, madje edhe në atë familjar, ku sërish nuk kanë munguar replikat, veçanërisht me deputetin Edmond Spaho.

Porti i ri turistik i Durrësit, theksoi dje Balluku nga foltorja e Kuvendit, është investimi më i madh në Shqipëri që do të ketë një impakt të rëndësishëm në ekonominë e vendit, por edhe të rajonit. Parashikohet të hapen 12 mijë vende të reja pune dhe do të jenë mbi 1.3 miliardë euro të ardhura në buxhetin e shtetit në 20 vitet e ardhshme.

Ndryshe nga sa është akuzuar nga opozita, zëvendëskryeministrja siguroi se e gjithë zona ku do të shtrihet projekti do të jetë e hapur dhe e aksesueshme nga cilido qytetar e vizitor dhe se do edhe një hapësirë prej 700 metrash plazh publik.

Një investim që do të ndryshoj faqen e Durrësit dhe të gjithë vendit, por njëkohësisht do ta bëjë qytetin e Durrësit me dy porte.

“Durrësi do të ketë portin më të madh të jahteve në Mesdhe dhe qyteti që do të ketë portin më të madh komercial në Ballkanin Perëndimor, që do të akomodojë, jo vetëm nevojat e Shqipërisë, por të Kosovës, Maqedonisë së Veriut, Serbisë dhe të gjithë vendeve të tjera që do ta shikojnë me fizibilitet më të lartë përpunimin e mallrave të tyre nga Durrësi. Dy porte. Qyteti me dy porte. Ky do të jetë Durrësi”, ju përgjigj Balluku dje akuzave të opozitës./CNA.al