Bullgaria nuk tërhiqet nga qëndrimi për Maqedoninë e Veriut/ Varhelyi: Zhgënjim i madh, 2 vite që mbahet peng

26 Prill 2022, 11:17, Aktualitet CNA

Përfshirja e pakicës bullgare në kushtetutën e Maqedonisë është një kusht që duhet përmbushur përpara se vendi të fillojë negociatat e anëtarësimit në BE.

Bullgaria duket se nuk do të tërhiqet nga qëndrimi ndaj maqedonisë së Veriut, duke penguar kështu çeljen e negociatave të anëtarësimit.

Ky qëndrim është konfirmuar nga ministrja e Punëve të Jashtme të Bullgarisë, Teodora Gençovska, gjatë një deklaratë për mediat para fillimit të forumit ?BE dhe Ballkani?.

Gençovska sqaroi se ky kusht për Maqedoninë është vendosur në deklaratën e Kuvendit Popullor dhe në vendimet e Këshillit Konsultativ për Siguri Kombëtare.

?Për të filluar procesin e negociatave të anëtarësimit në BE, mbetet kërkesa që Republika e Maqedonisë së Veriut të regjistrojë bullgarët në Kushtetutën e saj. Në këtë fazë fillimisht duhet ta zbatojnë dhe më pas të fillojnë negociatat me ta. Nuk e di se çfarë sinjalesh ka dhënë kryeministri (Kiril Petkov), por ky është qëndrimi ynë?, ka thënë ajo.

Ky qëndrim i diplomates bullgare tregon se ky vend as nuk tërhiqet në veton e vendosur për hapjen e negociatave të Maqedonisë së Veriut, veto e cila pengon edhe Shqipërinë. Edhe pse ka ende kohë deri qershorin e ardhshëm ku pritet të mbahet Këshilli Europian.

Komisioneri për Fqinjësinë dhe Zgjerimin Varhelyi, i cili ndodhet në Sofje, nga ana e tij është shprehur i zhgënjyer mbi integrimin e Shqipërisë në BE.

?Nëse ke pushtet dhe nuk e përdor, kjo konsiderohet nga të tjerët si kapitullim, dorëzim i pushtetit tënd dhe i kapaciteteve të tua. Çështja për Shqipërinë dhe Maqedoninë e Veriut është kur do fillojmë procesin e negociatave të anëtarësimit. Nuk mund ta fsheh zhgënjimin tim, që jemi ende duke vazhduar të diskutojmë këtë çështje. Ne menduam se e kishim zgjidhur dy vjet më parë dhe tani kjo është sërish në tryezë?, tha ai.

Kështu ka deklaruar Komisioneri pas takimit me kryediplomaten bullgare, Teodora Genchovska. Ndër të tjera, ai ka shtuar se BE-ja duhet t?i besojë më shumë vetes dhe fuqisë që ka, duke kaluar nga natyra transformuese e zgjerimit. Duke qenë se rrugëtimi i Shqipërisë drejt mbajtjes së Konferencës së Parë Ndërqeveritare varet edhe nga vetoja Bullgare kundrejt Shkupit, qëndrimi i Sofjes është në një lloj mënyre mohimi direkt e çeljes së negociatave.