Memelli motivon lojtarët, zbardhet fjalimi para ekipit

23 Shkurt 2022, 13:20, Sport CNA

Vërtet pozicioni të zhyt më shumë nga ana psikologjike, por Skënderbeu ka qenë edhe më keq se sot, nëse u referohemi statistikave të sezoneve të fundit. Pikërisht në kampionatin e kaluar, pavarësisht se nuk ishin në vendin e fundit të klasifikimit që mbahej nga Apolonia, korçarët pas 21 javësh të luajtura koleksiononin vetëm 13 pikë.

Pra, tri pikë më pak se çfarë ka bërë Skënderbeu në këtë sezon. Kjo tregon se situata nuk është tejet alarmante sa një sezon më parë dhe shifrat i japin të drejtë Memellit që të besojë te një shpëtim në fund të kampionatit.

Një vit më parë, nën drejtimin e Julian Ahmatajt, Skënderbeu kishte mundur të fitonte dy takime, të barazonte shtatë herë dhe të pësonte plot 12 humbje, duke u zhytur shumë pikë larg Kastriotit, që ishte në vendin e tetë.

Këtë sezon korçarët kanë 16 pikë të marra, mes tri fitoresh, shtatë barazimesh dhe 11 humbjesh, duke mbetur në fund, por vetëm tri pikë larg vendit të shtatë, që mbahet nga Egnatia dhe Dinamo (kanë të njëjtën kuotë pikësh).

Nëse shohim golavarazhin, statistikat e vjetshme ishin një katastrofë, me 19 gola të shënuar dhe 40 të pësuar.

ANALIZA ? Pikërisht për këtë besim, trajneri i Skënderbeut, Migen Memelli, ka mbledhur dje ekipin në një analizë, pas një dite pushimi të dhënë për skuadrën. Pogradecari i pankinës bardhekuqe ka dashur të shkundë skuadrën, duke i kërkuar karakter dhe forcë psikologjike për të kaluar këtë moment.

Si pas Memellit, ndeshja me Vllazninë, e cila luhet të premten në orën 16:45 në Korçë, duhet të shihet si pikë kthese në prag të duelit direkt me Kastriotin në javën tjetër.

?Jemi të zhgënjyer, të lodhur dhe të mërzitur, por unë dua të shoh sy të egër te ju. Dua të shoh një ekip që ka forcë karakteri dhe të jetë i gatshëm të luftojë për gjithçka të mundshme. Asgjë nuk ka mbaruar dhe s?kemi pse jemi me kokën poshtë. Po kalojmë një moment të keq dhe duhet të kërkojmë falje.

Po ku më mirë sesa në fushë u kërkohet falje tifozëve dhe të gjithë Korçës. Prandaj dua të keni grintë në fushë të premten. Karakterin e dua ta nxirrni në pah të gjithë?, mësohet të ketë thënë dje para ekipit trajneri Memelli, duke u munduar të karikojë lojtarët, të cilët po kalojnë një gjendje të rënduar psikologjike.