web counter
LEXO PA REKLAMA!

SHKARKO APP

App Store
Google Play

Shisnin teste falso për Covid/ Arrestohet farmacistja, në kërkim administratorja

17 Shkurt 2022, 08:21, Kronika CNA

Është arrestuar një farmaciste në Lezhë pasi u shiste qytetarëve teste falso për Covid. Në pranga ka rënë Kristjana.L., 25 vjeçe, banuese në Shënkoll.

Po ashtu bëhet me dije se është shpallur në kërkim administratorja e farmacisë, si dhe është proceduar në gjendje të lirë një shtetas tjetër.

“Është shpallur në kërkim shtetasja Aurora.U., 35 vjeçe, banuese në Lezhë, administratore e këtij subjekti privat farmaci.“, njfton policia.

Bëhet me dije se testi me përgjigje pozitive paguhej 100 euro, ndërsa testi me përgjigje negative paguhej 50 euro.

Nga hetimet e deritanishme, dyshohet që me këto teste fiktive janë pajisur rreth 500 shtetas të ndryshëm.

Gjithashtu, është proceduar në gjëndje të lirë shtetasi Arjan. D., 49 vjeç, banues në Lezhë, administrator i një subjekti privat biznes, i cili dyshohet se tek biznesi i tij kryente tampon/ testin e SARS-Cov-2, në kundërshtim me procedurat e përcaktuara në ligjin për testin SARS-Cov-2.

Gjatë kontrollit të ambientit, janë gjetur dhe sekuestruar në cilësinë e provës materiale 3 vula, 1 aparat telefonik iPhone, certifikata/teste të shtetasve të ndryshëm me rezultate pozitive e negative, si dhe fotokopje dokumentash identifikimi të shtetasve të pajisur me këto teste fiktive e të falsifikuara.

Materialet procedurale iu referuan Prokurorisë së Rrethit Gjyqësor Lezhë, për veprime të mëtejshme, për veprat  penale “Falsifikimi i dokumenteve shëndetësore”, “Fshehja e të ardhurave” dhe “Mospagimi i taksave dhe tatimeve”./ CNA.al





Lajmet e fundit nga