Aksioni në burgje/ Manja: Do jetë një operacion i përditshëm, nis rritja e pagave për punonjësit e policisë

3 Shkurt 2022, 10:32, Aktualitet CNA

Ministri i Drejtësisë, Ulsi Manja, ka reaguar nga Kuvendi pas megaoperacionit të zhvilluar në Elbasan, dy ditë më parë, ku u arrestuan shumë zyrtarë që kishin favorizuar të dënuarit në burgje.

Manja është shprehur se ky nuk do të mbetet thjesht një aksion në fjalë për do të jetë një operacion i përditshëm

Gjithashtu ka bërë me dije se duke filluar nga muaji Korrik i vitit 2022 do të rriten pagat për punonjësit e policisë së burgjeve.

Ndërkohë sipas ministrit, punonjësit e policisë që ndodhen brenda ambienteve të vuajtjes së dënimit nuk mund të mbajnë armë në brez, ndërsa shtoi se kjo bëhet për shkaqe sigurie.

?Në Bashkëpunim me Policinë e Shtetit dhe Prokurorinë e Elbasanit kemi finalizuar një operacion të suksesshëm për goditjen e një grupi kriminal që merreshin me veprimtari kriminale brenda dhe jashtë sistemit të burgjeve. Janë arrestuar disa punonjës së policisë në burgje. Ajo që ndodhi dje ishte një punë e nisur prej nesh. Nuk do të jetë aksion, nuk do të jetë as kalendar veprimtarish, por do të jetë operacion i përditshëm. Tani që flasim, pas shumë kohësh, drejtoria e burgjeve është në riorganizim total. Duam të ristrukturojmë kualifikimin e karrierës në policinë e burgjeve. Në vitin 2018 qeveria ka filluar një reformë për policinë e burgjeve. Sot që flasim kanë dalë të gjitha aktet nënligjore dhe shumë shpejt do të miratohet rregullorja e burgjeve. Më 1 janar 2021 ka filluar rritja e pagës për çdo vit shërbimi, dhe nga korriku 2022 do të nisë rritja e pagës për sektorët e posaçme të punës. Sot që flasim nuk ka asnjë rast vonese të mos pagesës së orëve pas orarit. Nuk mund të lë pa përmendur trajtimin e bërë për stafin shëndetësor, pjesë e stafit të burgjeve. Kanë pasur rritje page në nivelin 47%. Paraqitja e jashtme është po aq e rëndësishme sa sjellja e komunikimi i policëve. Në 2019 policia e burgjeve është pajisur me uniformë.

Në Shqipëri gjatë kësaj kohe kemi pasur 2 ngjarje, pandeminë dhe tërmetin. Qeveria është detyruar të riorientojë fondet në sektorët më emergjentë. Drejtoria e Policisë ka lidhur kontrata me shoqëri transporti, për të garantuar lëvizjen e punonjësve. Nuk ka punonjës të rolit bazë të jetë emëruar 45 km nga vendbanimi. Nga kjo politikë e ndjekur janë trajtuar 140 punonjës të policisë së burgjeve. Kam kryer disa inspektime dhe jam i ndërgjegjshëm për mangësitë që kemi. Dua të përmend pa modesti se në nëntor të vitit të kaluar kemi mbyllur institucionin e Zeharisë.

Dua t?ju siguroj të nderuar kolegë se po përgatisim projekte për ndërhyrjet në të gjitha burgjet e vendit. Me fondet e rindërtimit do të nisë puna dhe do të kemi një institucion të ri në Shën Koll. Sipas ligjit, përfitohet një vakt për punonjësit që punojnë 8 orë dhe 3 vakte për punonjësit që janë në punë 24 orë. Ka pasur një shqetësim nga sindikatat për armët e zjarrit. Punonjësve të policisë i ndalohet mbajtja e armëve në këto institucione. Armët lejohen në rrethimin perimetrik dhe në ambientet jashtë burgut. Dokumentimi i armës do të sillte situata të pakëndshme. Në progres raport i është kushtuar vëmendje trajnimeve, e sipas progres raportit janë trajnuar mbi 1.400 staf në burgje, janë në fuqi 6 manuale në lidhje me programet rehabilituese. Aktualisht këto institucione janë 81% të populluara, 19% më pak se kapaciteti i tyre maksimal?,tha Manja./A.E-CNA.al