E fundit!

10:40 Denoncim

Zbulohet skema/ Trekëndëshi: Bashkia e Tiranës - “Kuadr.com” - Arbër Veliaj

CNA ka nisur një tjetër investigim që mund të çojë drejt z...

Përplasje me policinë/ Plagosen 53 persona në xhaminë Al-Aqsa

8 Maj 2021, 06:14, Kosova & Bota CNA

Besimtarët palestinezë u përplasën me policinë izraelite të premten vonë në kompleksin e xhamisë Al-Aqsa, një ndër vendet e shenjta më të rëndësishme për myslimanët dhe hebrenjtë, në një përshkallëzim të dhunës disa javore në Jeruzalem që ka bërë jehonë në të gjithë rajonin.

Shërbimi i urgjencës i Gjysmëhënës së Kuqe Palestineze tha se 53 vetë u plagosën në përleshjet me policinë në Jeruzalem, nga të cilët 23 u shtruan në spital. U njoftua se shumica u plagosën në fytyrë dhe në sy nga plumbat e veshur me gomë dhe copëzat e shashkave. Izraeli tha se gjashtë oficerë policie u plagosën.

Më herët të premten, forcat izraelite qëlluan dhe vranë dy palestinezë dhe plagosën një të tretë pasi ata hapën zjarr në një bazë që i përkiste forcës paraushtarake të Policisë së Kufirit të Izraelit në Bregun Perëndimor të okupuar, më e fundit kjo në një seri konfrontimesh vdekjeprurëse gjatë javëve të fundit dhe që përkon me muajin e shenjtë mysliman të Ramazanit.

Tensionet janë rritur në javët e fundit në Jeruzalemin lindor, i cili pretendohet nga Izraeli dhe nga palestinezët. Në fillim të Ramazanit, Izraeli bllokoi një vend popullor ku palestinezët tradicionalisht shoqërohen në fund të agjërimit të tyre gjatë gjithë ditës. Masa shkaktoi dy javë përplasje përpara se Izraeli të tërhiqte kufizimet.

Kërcënimet për dëbim

Por ditët e fundit, përplasjet kanë rifilluar për shkak të kërcënimit për dëbim nga Izraeli të dhjetëra palestinezëve në lagjen Sheikh Jarrah në Jeruzalemin lindor, të cilët janë përfshirë në një betejë të gjatë ligjore me kolonët izraelitë që përpiqen të marrin prona në këtë lagje.

Shtetet e Bashkuara thanë se janë “thellësisht të shqetësuara” për tensionet e rritura dhe u bënë thirrje të gjitha palëve të punojnë për çtensionimin e situatës. Gjithashtu ato shprehën shqetësim në lidhje me dëbimet e kërcënuara.

“Është thelbësore të shmangni hapat e njëanshëm që do të përkeqësonin tensionet ose do të na largonin më shumë nga paqja. Dhe kjo do të përfshinte dëbimet, aktivitetin e vendbanimeve dhe shkatërrimet e shtëpive”, u tha gazetarëve në Uashington zëdhënësja e Departamentit amerikan të Shtetit Jalina Porter.

Kompleksi i xhamisë Al-Aksa është vendi i tretë më i shenjtë në Islam. Ai është gjithashtu vendi më i shenjtë për hebrenjtë, të cilët i referohen vendit si Mali i Tempullit dhe e respektojnë atë si vendi ku ndodheshin tempujt biblikë. Vendndodhja ka qenë prej kohësh një pikë e ndezur për dhunën mes izraelitëve dhe palestinezëve dhe ishte epiqendra e intifadës, apo kryengritjes palestineze të vitit 2000.

Policë të shumtë izraelitë u dislokuan ndërsa adhuruesit myslimanë po mbanin lutjet e mbrëmjes në vendndodhje. Ishte e paqartë se çfarë shkaktoi dhunën, por videot që qarkullonin në internet tregonin besimtarët që hidhnin karrige, këpucë dhe gurë në drejtim të policëve, të cilët qëlluan me shashka dhe plumba të veshura me gomë për t’i shpërndarë. Përleshje më të vogla shpërthyen diku tjetër në Jeruzalem.

Policia izraelite tha se protestuesit hodhën gurë, fishekzjarre dhe sende të tjera ndaj tyre, duke plagosur gjashtë oficerë, të cilët kërkuan trajtim mjekësor. “Ne do t’i përgjigjemi me një dorë të rëndë të gjitha shqetësimeve të dhunshme, trazirave dhe sulmeve ndaj forcave tona”, thuhet në një deklaratë.

Më parë, rreth 70 000 besimtarë kishin marrë pjesë në lutjet e fundit të së premtes së Ramazanit në Al-Aqsa, tha organizata islamike që mbikëqyr objektin. Mijëra protestuan më pas, duke tundur flamujt e gjelbër të grupit militant islamik Hamas dhe duke brohoritur parulla pro Hamasit.

Jordania fqinje, e cila shërben si kujdestare e vendeve të shenjta myslimane të Jeruzalemit, e kishte paralajmëruar më parë Izraelin kundër hapave të mëtejshëm “provokues”, ndërsa Irani, armiku kryesor i Izraelit, inkurajoi dhunën.

Gjatë sulmit të premten në mëngjes, policia izraelite tha se tre sulmues qëlluan me armë mbi bazën pranë qytetit verior Jenin, në Bregun Perëndimor. Policia Kufitare dhe një ushtar izraelit kthyen zjarr, duke vrarë dy prej burrave dhe duke plagosur të tretin, i cili u evakuua në një spital./VOA