web counter
LEXO PA REKLAMA!

SHKARKO APP

App Store
Google Play

E fundit!

x

Ndahet nga jeta gjuhëtari i njohur shqiptar

30 Dhjetor 2020, 09:01, Sociale CNA

Ndahet nga jeta në moshën 84-vjeçare Prof. Dr. Mehmet Çeliku.

Profesor Çeliku ishte një gjuhëtar i shquar dhe titullar i disa lëndëve gjuhësore. Ai ishte gjithashtu bashkëpunëtor i Akademisë së Shkencave dhe ish-rektor i Universitetit ?Aleksandër Xhuvani?, në Elbasan.

Prof. Dr Mehmet Çeliku ka lënë pas një gamë të gjerë librash, pasi është autor i plot 200 teksteve gjuhësore.

Jetëshkrim për prof. dr. Mehmet Çelikun

Profesor Mehmet Çeliku u lind në Elbasan në 15 janar 1936. Shkollën e mesme e kreu në Elbasan dhe më pas studioi për gjuhë-letërsi në Universitetin e Tiranës, Fakulteti Histori-Filologji. Me mbarimin e studimeve universitare, filloi punë si bashkëpunëtor shkencor në Akademinë e Shkencave të Shqipërisë, Instituti i Gjuhësisë dhe i Letërsisë nga viti 1958 deri në 1973, vit kur nisi edhe punën në Universitetin e Elbasanit, në atë kohë Instituti i Lartë Pedagogjik ?A.Xhuvani?.

Profili shkencor në Akademi i profesor Çelikut ishte dialektolog. Gjatë 15 viteve të punës në këtë institucion ai hulumtoi mbi njëqind pika të banuara dhe studioi të folmet e gegërishtes jugore dhe të folmet kalimtare. Ishte bashkëhartues i Gramatikës së Akademisë, vëllimi II, si dhe pedagog i jashtëm në Universitetin e Tiranës.

Në vitin 1973 prof. dr. Mehmet Çeliku emërohet si pedagog në ILP ?A.Xhuvani?, mori detyrën e përgjegjësit të katedrës së gjuhës, letërsisë dhe gjuhëve të huaja, dhe e drejtoi atë për 19 vjet, deri në vitin 1992, duke i dhënë kësaj njësie një profil të qartë kërkimor shkencor, por edhe një mësimdhënie të nivelit universitar të denjë për traditën e qytetit të Elbasanit. Ai punoi për 41 vite në këtë universitet deri në fund të punës së tij si mësimdhënës universitar.

Mehmet Çeliku ishte titullar i disa lëndëve gjuhësore, si: morfologji, sintaksë, dialektologji, shqipe standarde dhe i tri kurseve speciale në fushë të gjuhës (ku trajtoi probleme të morfologjisë, çështje të normës gramatikore, format e pashtjelluara të foljes); disa nga lëndët dhe kurset e tij janë zhvilluar edhe në Universitetin e Tiranës, por edhe në universitete të tjera të vendit (Gjirokastër, Tetovë etj.).

Ishte rektori i Universitetit ?A. Xhuvani? Elbasan nga viti 1992 deri në 1996.

Përkushtimin e tij ndaj kërkimit shkencor dhe gjuhës shqipe e vijoi në Elbasan me të njëjtin intensitet si në vitet e Akademisë dhe në vitin 1980 mori titullin ?Kandidat i shkencave? me disertacionin ?Gegërishtja jugperëndimore?; në vitin 1984 mori titullin ?Docent?; në 1990 mori titullin ?Doktor i shkencave? me disertacionin ?Format e pashtjelluara të foljes në gjuhën e sotme shqipe?; në vitin 1994 mori edhe titullin ?Profesor?.

Gjithashtu ai është nderuar edhe me titujt ?Punonjës i shquar i shkencës dhe i teknikës? (1987), ?Mësues i Popullit? (1993), dhe ?Qytetar nderi? i Elbasanit (2006).

Veprimtaria botuese e profesor M.Çelikut përmbledh rreth 200 zëra (libra, monografi, përmbledhje, tekste universitare, artikuj, referate, kumtesa), me mbi 3500 faqe të botuara.

Projekti i fundit në duart e profesorit, me të cilin kishte disa vite që po punonte, ishte ?Parafjalët e gjuhës shqipe (vështrim morfo-sintaksor)?, 380 faqe dorëshkrim i daktilografuar.

Artikujt e botuar në organe shkencore janë të shumtë (131 tituj) dhe po ashtu të shumta janë edhe pjesëmarrjet e tij në konferenca brenda dhe jashtë vendit.

Në 31-31 tetor 2015 Universiteti i Elbasanit organizoi një konferencë shkencore mbarëkombëtare me titull ?Mehmet Çeliku ? personalitet i gjuhësisë shqiptare?, ku morën pjesë 61 kumtues me 53 kumtesa nga Shqipëria, Kosova, Maqedonia e Veriut. /CNA.al





Lajmet e fundit nga