5 muaj larg zgjedhjeve/ PD fillon kontestimet

8 Dhjetor 2020, 10:55, Aktualitet CNA

Dje një përfaqësues i PD doli dhe përhapi frikën e manipulimit të zgjedhjeve nga KQZ duke përdorur votën e emigrantëve.

Duke qenë se përfaqësuesi njihet si zëdhënës dhe jo si prodhuesi i tezave, na duhet të besojmë se ky është një sinjal për përgatitjen “serioze” të PD-së për kontestimin e ardhshëm të rezultatit të zgjedhjeve të datës 25 Prill. Pas tetë vjetëve në opozitë, pasi bëri përshesh gjithë dispozitat e ndryshimeve të Kodit Zgjedhor, pasi emëroi me votën e Edi Ramës ata që deshi në KQZ, Luli Basha me sa duket tani po përgatit tezat e kontestimit të zgjedhjeve.

Para disa ditëve nën dorë u shpërnda një material i përgatitur nga administrata e KQZ me tre opsione për bërjen të mundur të votës së emigrantëve. Secili opsion paralelisht shoqërohej me risqet eventuale. KQZ nuk ka marrë asnjë vendim për sa i takon votës së emigrantëve. Rregullat dhe procedurat e bërjes së mundur të votimit të emigrantëve, miratohen nga Komisioni Rregullator.

Atje opozita ka 2 përfaqësues të cilët janë aq dinjitozë sa opozita zgjodhi që të jenë. Në këto kushte do ishte logjike që të jenë ata përfaqësues, brenda KQZ-së që në mbledhje publike, (siç Kodi Zgjedhor parashikon), të bëjnë kontestimet e tyre për draftet, të diskutojnë mbi to dhe pse jo, të propozojnë drafte të reja.

Kodi Zgjedhor i njeh të drejtën çdo anëtari të Komisionit Rregullator që të fusë për shqyrtim edhe akte të plota alternative me ato të përgatitura dhe të vëna në dispozicion nga administrata e KQZ-së. Atëherë pse i duhet PD-së që të nxjerri zëdhënësat e të paralajmërojë manipulime zgjedhjesh dhe aq më keq kontestine rezultatesh?

PD ka përfaqësuesit e vet në KQZ.Të përdorë ata përfaqësues për të hartuar rregullat e votimit të emigrantëve ashtu siç PD beson se kjo nuk rrezikon manipulimin e votimit. Kodi lejon që ato drafte të shkruhen edhe në PD. Pastaj përfaqësuesit dinjitozë të opozitës në KQZ, të dalin para të gjithëve, në mbledhje publike e të mbrojnë formulimet që ruajnë zgjedhjet.

Deklarata televizive, kur të është dhënë opsioni të shkruash propozimin alternativ, në shqip quhen dëngla. Dhe PD nuk i mbron dot votat me dëngla zëdhënësish që nuk dinë të draftojnë alternativa që nuk arrijne të vënë me shpatulla pas murit, as derdimenët e Ramës në KQZ./CNA.al.