E fundit!

10:35 Live Updates

Hijet e Erion Veliajt në protestë

Veliaj përmes Arta Dades refuzon “antimiti...

Mesazhi i fortë i Sonila Meços/ Nuk ngjan kohë dëshmorësh, por ja që dëshmorë ka

6 Maj 2019, 12:36, Aktualitet CNA

Gazetarja e njohur, Sonila Meço, ka reaguar mbi ngjarjen e rëndë që ndodhi mëngjesin e sotëm në Letoni. Ngjarje në të cilën mbeti e vrarë një ushtarake dhe dy të tjerë janë plagosur.

Meço shprehet mjaft e indinjuar duke treguar dhimbjen që shkaktoi kjo ngjarje tek vet ajo dhe në opinionin e gjerë publik.

?Brenda Shqipërisë, burra me namuz të madh e krekosje gushpërpjetë nuk ia dolën të sakrifikojnë ca nga egoizmi dhe mania për pushtet, grykësia për pasuri dhe ambicja e shfrenuar për sundim absolut, për ta sjellë filozofinë e standardeve të NATO-s në Shqipëri,?- shkruan Meço në postimin e saj duke nënkuptuar se në fakt egoizmi dhe mania për pushtet, grykësia për pasuri dhe ambicja e shfrenuar për sundim absolute bënë që efektivja e policisë të humbte sot jetën, nga mungesa e standardeve në radhët e ushtrisë tonë.

Postimi i Plotë i Sonila Meços

Nuk ngjan kohë dëshmorësh, por ja që dëshmorë ka.

Zarifja, 32 a 27 vjeçare (ende lajmet janë kontradiktore), efektive e Forcave të Armatosura, në misionin e mbrojtjes kolektive të NATO-s në Letoni humbi jetën si pjesë e grupit xhenier në asgjësimin e municioneve dhe lëndëve eksplozive të paplasura.
Me të u plagosën Klodiani dhe Juliani.

Kur diplomacia dyshonte për nevojën e ekzistencës së NATO-s me shpërbërjen e Bashkimit Sovjetik, Shqipëria e vogël nxitonte të kapte rreshtimin në kahun e duhur të historisë. Dhe kish shumë rëndësi për ne, garanci, siguri, standarde të botës së civilizuar, mbrojtje e të drejtave të njeriut e mekanizmave të demokracisë.

Brenda Shqipërisë, burra me namuz të madh e krekosje gushpërpjetë nuk ia dolën të sakrifikojnë ca nga egoizmi dhe mania për pushtet, grykësia për pasuri dhe ambicja e shfrenuar për sundim absolut, për ta sjellë filozofinë e standardeve të NATO-s në Shqipëri.

Një vajzë, nëntetare, tashmë shuar shpërthimit, komandanti dhe rreshteri i Kontigjentit, të dy të plagosur dhe gjithë grupi shqiptar në mision, me devotshmëri, duke respektuar parimet e Aleancës, në emër të sigurisë së përbashkët, për garantim paqeje, jetë e të drejtash njeriu, përballeshin me vdekjen çdo ditë.

Do burrni të ndërtosh paqen në kohë e vende me gjurmë lufte, por të ndërtosh luftën në kohë e vende paqeje do vetëm maskarallëk. Zarifja na kujtoi çfarë sakrifice kërkon paqja, cfarë devotshmërie, disipline e përkushtimi, çfarë trimërie e besimi.

Në paçi dhimbje sot o njerëz që keni në dorë fatet e këtij vendi, nëse ju ka prekur e lënduar shuarja në krye të misionit e Zarifes, bijës që sot u pikëlloi shpirtin familjarëve e shqiptarëve, bëjini vetëm një nderim: premtojini se do të jeni si ajo! Misionarë të devotshëm të paqes dhe sigurisë për njerëzit në një botë standardesh demokratike. Dhe pranoni paburrërinë tuaj, që NATO-s nuk ditët t?ja ruani standardet brenda kufijve, po eksportuat në botë me djem e vajza të përkushtuar atë që s?ditët ta bënit për vendin tuaj.

Të qoftë dheu i lehtë në paqen e përjetshme Zarife!