Foto-Rinisin kërkimet për Bleona Matën/ Si ka ndryshuar pas 9 vitesh pamja e saj

20 Mars 2019, 13:11, Aktualitet CNA

Qendra Kombëtare e Fëmijëve të Humbur në Shqipëri një shërbim i CRCA Shqipëri dhe Linja Kombëtare për Fëmijët e Humbur ALO 116 000, në bashkëpunim me Policinë Britanike, Qendrën e Personave të Humbur në Britani dhe BBC rinisin kërkimet për Bleona Mata, vajza e humbur 9 vite më parë në Fshatin Zapod të Kukësit.

Për herë të parë në vendin tonë qendra ka arritur të realizojë imazhin e progresuar të vajzës së zhdukur, një skicë e përafërt kjo sesi mund të duket Mata në moshën 16 vjeç. Identikiti i ri i Matës, është realizuar falë bashkëpunimit me Qendrën Globale të Fëmijëve të Humbur, CRCA Shqipëri dhe ALO 116. Bleona Mata u zhduk në mënyrë misterioze pasditen e 22 majit të vitit 2010 (në atë kohë 6 vjeçe), teksa kulloste bagëtitë në malin e fshatit Zapod të Kukësit së bashku me 5 vajza, të afërme të saj.

Imazhi progresiv i Bleona Matës është realizuar nga ekspertët më të mirë amerikanë të Qendrës Globale
për Fëmijët e Humbur (ICMEC). Bazuar në kërkesën e CRCA dhe ALO si anëtare të Rrjetit Global për
Fëmijët e Humbur, ekspertët amerikane arritën të realizojnë një identikit progresiv të një prej rasteve
më të bujshme të fëmijëve të humbur në Shqipëri. Bleona Mata, vjen në këtë imazh falë ndihmës së
fotove të nënës së saj, dhe vëllait më të vogël, imazhe këto që kanë ndihmuar së tepërmi ekspertët në
ndërtimin fizionomisë së ndryshuar së vajzës që sot është në moshën 16 vjeç.

Bleona Mata humbi në vitin 2010 duke kullosur bagëtitë në Zapod të Kukësit. Kërkimet për Matën u
shtrinë në të gjithë vendin si edhe në vendet kufitare, pa asnjë rezultat. Për rreth 10 vite rresht nëna e
saj vijon të kërkojë vajzën. Qendra Kombëtare e Fëmijëve të Humbur, si shërbim i CRCA dhe ALO 116 në bashkëpunim me Policinë Britanike, Qendrën e Personave të Humbur në Britani dhe rrjetin mediatik
BBC, do të rinisin kërkimet për vajzën e humbur, në bazë të këtij imazhit progresiv të ofruar së fundmi.
Në vijim kjo linjë do të ndiqet edhe për të gjithë fëmijët e deklaruar të humbur në vendin tonë.
Bazuar në të dhënat zyrtare të Policisë së Shtetit përgjatë 3 viteve të fundit numri i fëmijëve të
humbur në Shqipëri ka arritur në 365 fëmijë prej tyre 353 të kthyer sërish pranë familjeve dhe 12
prej tyre janë ende në kërkim policor. Shqipëria është vendi i parë jo-antar i Bashkimit Europian
që ngriti shërbimin kombëtar për fëmijët e humbur që nga viti 2009. CRCA Shqipëri është anëtare
me të drejta të plota e Rrjetit Global për Fëmijët e Humbur që në vitin 2010, ndërsa ALO 116 dhe
CRCA janë anëtare të Missing Children Europe (MCE)-Rrjeti për Fëmijët e Humbur në Europë.