E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Pasuria e gjyqtarëve dhe prokurorëve “trondit” institucionet

3 Mars 2018, 09:12, Kronika CNA

Verifikimi i pasurisë për shumicën e gjyqtarëve dhe të prokurorëve në vend ka përfunduar. Komisioni i Pavarur i Kualifikimit ka mbyllur raportet për 93 emrat prioritarë, por një punë intensive ka bërë dhe Inspektorati i Lartë i Kontrollit dhe Deklarimit të Pasurive.

Pranë ILDKP janë dorëzuar dosjet e pasurisë për 800 gjyqtarë dhe prokurorë. Por në sitë po kalojnë dhe familjarët e tyre që në total shkojnë mbi 3 mijë persona.

Ajo që bie në sy është se në lëvizje bashkë me ILDKP janë vënë dhe disa institucione të tjera në lëvizje. Komisioni i Pavarur i Kualifikimit dhe ILDKP kanë kërkuar asistencë nga mbi 12 institucione, raporton gazeta Sot.

Së pari janë angazhuar gjykatat dhe prokuroritë për të verifikuar gjendjen gjyqësore të gjyqtarëve dhe prokurorëve. Po ashtu në lëvizje janë vënë Zyrat e Gjendjes Civile për të vërtetuar nëse kanë deklaruar në rregull të dhënat e identiteti apo jo.

Po ashtu në lëvizje është vënë dhe kompania e cila merret me nxjerrjen e kartave të identitetit dhe pasaportave, për të marrë shenja gishtash. Rol thelbësor kanë po ashtu bankat. Mësohet se u është kërkuar që të japin të dhëna mbi llogaritë bankare.

Një tjetër institucion që po angazhohet për të verifikuar gjyqtarët dhe prokurorët është Qendra Kombëtar e Biznesit, pasi si KPK dhe ILDKP kanë kërkuar prej saj të dhëna mbi bizneset që kanë deklaruar me dhjetra gjyqtarë dhe prokurorë.

Rol kyç ka dhe Drejtoria e Pastrimit të Parave e cila po heton për transferta të dyshimta jashtë shtetit. Po ashtu asistencë po japin dhe hipotekat, pasi ato kanë dorëzuar në ILDKP dhe KPK të dhëna mbi pronat e paluajtshme të gjyqtarëve dhe të prokurorëve.

Verifikime po bëhen dhe për automjetet e gjyqtarëve dhe janë kërkuar të dhëna nga drejtoria përgjegjëse ku regjistrohen makinat. Në disa raste ka pasur ballafaqime dhe me noterët, pasi janë ata që kanë hedhur firmën për shumë pasuri të paluajtshme.

Institucioni i fundit i angazhuar është policia kufitare, e cila jep të dhëna mbi kalimet jashtë vendit që mund të kenë bërë gjyqtarët dhe prokurorët. Sipas informacioneve, nga verifikimet e deritanishme një pjesë e madhe nuk e justifikojnë pasurinë.