ÇFARË NUK THA Edi Rama në Korçë?/ Nga Elvi FUNDO

5 Tetor 2016, 14:51, Aktualitet CNA

Kryeministri Edi Rama ishte në Korçë, zhvilloi një inagurim, pastaj vazhdoi festën e tij duke qënduar me miq e duke diskutuar për zgjedhjet.

Në fakt inagurimi i Muzeut të Artit Mesjetar në Korçë, ishte dicka pozitive, gjithmonë punët duhen vlerësuar.

Ashtu siç duhet vlerësuar pazari, parku Rinia apo ndonje lopatë asfalt kudo që hidhet.

Por përpara se të flasë për histori dhe vlera Edi Rama duhet të tregoje disa detaje që shpesh i mban të fshehta.

Së pari pse investon vetëm në fasada dhe kulla betoni. Ende sot në Korçë nuk ka asnjë investim në shërbim të zhvillimit ekonomik dhe biznesit. Parku është për shëtitje dhe njerëzit nuk mund të hanë bar, pazari po është mbyllur në mënyrë arbitrare dhe totalisht antiligjore, kulla e betonit i shërben dy të punësuarve dhe ndonjë turisti, ashtu siç do shërbeje për turizmin.

Rama nuk ju ka thënë kurrë korçarëve se kush i vendos prioritetet për qytetin. Miliona euro janë hedhur dhe në Korçë thellohet papunësia. Miliona euro për fasada, parqe, muze, pazar. Papunësi dhe mjerim që thellohet.

Rama nuk tha në Korçë se niveli i papunësisë në këtë qytet i kalon 50%

Rama nuk tha në Korçë se qyteteti i serenatave është kthyer në qytetitn me përdorimin më të madh të rama-peleshi drogës për numër popullsie nga të rinjtë.

Rama nuk tha në Korçë, që spitali ka vetëm një anestezist, shumë pak staf mjekësor dhe është më keq se në kohën e Enverit. Dhe është përballë muzeut që ai inagurovi duke ju rrëzuar suvatë jashtë e brenda.

Rama nuk tha në Korçë se qytetit ka plagë, por i tregoi një muze. Ato të ardhurat e tij shkojnë në buxhet dhe kaq.

Rama nuk tha pse po ndërton dhomen e gjumit apo sallonin, kur shtëpisë po i bie çatia. Rinia po mer arratinë, llotaria amerikane ka bërë kërrdinë në Korçë, emigracioni në Greqi nuk ndalet as në 2016. Tani zgjidhje janë edhe Gjermania, Suedia apo Turqia.

Rama nuk tha se në Korçë nuk ka asnjë investim për rritjen ekonomike, asnjë investim që hap vende pune. Janë dhjetra milionë euro që kalojnë në dy apo tre duar dhe asgjë më shumë se kaq.

Edi Rama në Korçë nuk foli asgjë për drejtorët e tij hajdutë dhe të korruptuar që ju vjedhin shtëpitë dhe kanë frikë ta denoncojnë në polici.

Edi Rama nuk flet në Korçë për korçarët, por shkon e flet sipas qejfit të tij, për qëllimet e tij. Ai së bashku me zëvendësin e tij apo kryebashkiakun sa herë shkojnë apo flasin në Korçë sillen si papagallë. Thonë e përsërisin të njejtën gje. Rilindje, Rilindje, Rilindje, thua se Korça po shpëton nga fasadat dhe betoni. Korça ska nevojë për papagaj, por ka nevojë për investime që sjellin zhvillim ekonomik e jo investime që mbushin shpejt xhepa pushtetarësh.