Skandali/ Basha dhe Rama i dorëzuan filtrin e parë të emërimeve në Drejtësi, Ilir Metës

23 Korrik 2016, 13:59, Aktualitet CNA

Lulim Basha, Kryetari i Partisë Demokratike, dhe Edi Rama, Kryeministër i vendit, i kanë dorëzuar filtrin e parë të emërimeve në Drejtësi, Ilir Metës, Kryetar i Kuvendit dhe njëherëz Kryetar i LSI-së.

Kjo konfirmohet nga drafti i miratuar me konsensusin e 140 deputetëve të Kuvendit të Shqipërisë, në orët e para të mëngjesit të 22 Korrikut.

Më konkretisht, formula konsensuale për të cilën Basha ra dakort në orët e fundit të negociatave, parashikon që aplikimet vijnë pranë Sekretarit të Përgjithshëm të Kuvendit nga Avokatia, pedagogët e Fakultetit të Drejtësisë, Shkollës së Magistraturës dhe nga Shoqëria Civile, për 5 anëtarë jo gjyqtarë dhe 5 anëtarë jo prokurorë të Këshillit të Lartë Gjyqësor dhe Këshillit të Lartë të Prokurorisë.

Sekretari i Përgjithshëm i Kuvendit, verifikon brenda dhjetë ditësh nëse kandidatët plotësojnë kushtet e parashikuara nga Kushtetuta dhe ligji, si dhe vlerëson kriteret profesionale e morale dhe përgatit listën.

Filtri kryesor është ai nënkomisionit me 5 anëtar, ku tre janë përfaqësues të shumicës dhe 2 të pakicës. Kandidatët që Sekretari i Përgjithshëm i Kuvendit i ka përjashtuar nga lista mund të rikthehen vetëm nëse 4 nga 5 anëtarët e komisionit votojnë pro.

Nënkomisioni përzgjedh kandidatët me të paktën 4 vota. Nëse nuk arrihet shumica e kërkuar, kandidati përzgjidhet me short. Të përzgjedhurit përmblidhen në një listë të vetme dhe i dërgohen Kryetarit të Kuvendit.

Më pas, Kuvendi mund ta rrëzojë në bllok listën e kandidatëve me 2/3 e të gjithë anëtarëve.

Nëse lista rrëzohet, procedura vazhdon në nënkomision sipas procedurës së parashikuar në pikën 7 të këtij neni, por jo më shumë së dy herë.

Në rast se kandidatët nuk përzgjidhën pas tri raundeve, përzgjedhja e tyre bëhet me short.

Në rast se lista nuk rrëzohet, kandidatët e përzgjedhur konsiderohen të zgjedhur.

Duhet theksuar se për emërimet e para në KLGJ e KLP verifikimi i kandidatëve do të kryhet nga Sekretari i Përgjithshëm i Kuvendit dhe nga Operacioni Ndërkombëtar i Monitorimit.

Si u vendos që filtri i parë i emërimeve kalon nga Meta?

Në draftet dhe propozimet e shumta që kanë shoqëruar debatin mbi reformën në drejtësi parashikohej fillimisht që kandidatiturat do t?i propozoheshin Presidentit të Republikës.

Por duke qenë se në Krye të Shtetit ishte Bujar Nishani, Partia Socialiste refuzoi një propozim të tillë, për faktin se Nishani konsiderohej i zgjedhur i PD-së.

Më pas doli varianti që filtri kalonte përmes Avokatit të Popullit dhe ky ishte zgjidhja, e cila ekzistonte deri në negociatat e fundit, përpara se PD të refuzonte draftin hibrid të propozuar nga Ndihmës Sekretarja amerikane Victoria Nuland, duke hyrë në një process tjetër negociatash që nisi mëngjesin e 21 Korrikut dhe u përmbyll rreth orës 22:00 të të njëjtës ditë.

Po çfarë ndodhi me negociatat? Ato u zhvilluan me një angazhim absolut të Ilir Metës, i cili prej mëngjesit të 21 Korrikut kishte humbur qetësinë. Fillimisht pati një përplasje me Fatmir Xhafaj në mbledhjen e Konferencës së Kryetarëve, ndërsa me nisjen e seancës i drejtoi një apel Lulzim Bashës për të sqaruar pozicionin me SHBA.

Deklarata e Metës u duk si një rrufe në qiell të hapur, edhe për faktin se disa herë Kryetari i Kuvendit iu drejtua Ambasadorit amerikan në Tiranë që të mos dëgjonte fjalët lart e poshtë se Ilir Meta bënte rolin e dyfishtë.

Pas kësaj, Meta ishte pjesë e negociatave mes Ambasadorëve të SHBA dhe BE-së me kreun e PD-së, Lulzim Basha, ndërsa Edi Rama ishte mjaftuar që të deklaronte se do të pranonte çdo draft që do të kishte dakordësinë e SHBA dhe BE-së, pavarësisht se kush e shkruante.

Në përfundim, u hartua drafti përfundimtar, i cili çuditërisht nuk ishte me variantin që filtri i parë kalonte përmes Avokatit të Popullit, por kalonte nga Sekretarja e Përgjithshëm e Kuvendit, pozicion që sot mbahet nga Albana Shtylla, dikur me PS-në, ndërsa sot me LSI-në. /citynews/