Kriminaliteti shqiptar bashkëpunon me terrorizmin - Masakra e Nicës

19 Korrik 2016, 11:46, Aktualitet CNA

Nga GJERGJ TAHANASI

Ekspertët perëndimorë të luftës kundra terrorizmit kohë mëparë kishin dhënë alarmin për një mpleksje të kriminelëve ordinerë shqiptarë (banda të strukturuara kriminale ose jo) me segmente të terrorizmit ndërkombëtar. Deri dje ky ishte një thënie ekspertësh, por gjithsesi e pa mbështetur nga prova konkrete. Pas masakrës së Nicës antiterrori francez arriti të provojë marëdhëniet simbiotike midis terroristit tunizian Mohammed Bouhel dhe një cifti shqiptarësh. Enkelejda Zace, 38 vjece lindur në Elbasan dhe banuese në Francë me shtetësi francize e martuar me Artan Henaj 34 vjec lindur në Fier dhe resident po në Nicë janë dy personat, që kanë furnizuar me armë terroristin tunizian, përgjegjës për masakrën e përbindshme të Nicës. Enkelejda Zace për të maskuar aktivitetin kriminal të trafikimit të armëve të vogla dhe të lehta si edhe të drogave të klasit A (kokainë) në sasi relativisht të vogla kishte regjistruar një kompani të saj në Nicë, që në vitin 2011. Kompania quhet ?SARL Zace Interventions? e specializuar në riparim-rikonstruksion ndërtesash si edhe në krijim-mirëmbajtje lulishtesh e parqesh. Kjo kompani e ka adresën e biznesit në Bulevardin Rimbaldi në qytetin e Nicës.

Cifti shqiptar armët i siguronte në Shqipëri dhe më pas me to furnizonte kriminalitetin lokal në Rivierën franceze. Antiterrori francez nuk ka prova se cifti shqiptar ka furnizuar me armë edhe elementë të tjerë ekstremistë përvec tunizianit të Masakrës së Nicës. Policia italiane ka arritur të dokumentojë rrugën e armëve dhe të sasive të vogla të kokainës nëpër territorin italian për në Rivierën franceze. Zace nisej nga Nica me makinën personale dhe zbriste deri në Bari mbi 850 Km larg. Në Portin e Barit merrte tragetin për në Durrës. Për Zacen pikat më të lehta përtë kryer këtë trafik droge dhe armësh ishin Porti i Durrësit dhe ai i Barit. Kjo rrugë trafiku duhet të ketë qenë mjaft shqetësuese për autoritet ligjzbatuese italiane, derisa ato kanë informuar edhe ministrin e brendshëm Alfano, i cili ka informuar për këtë trafik edhe anëtarët e komisionit të sigurisë (shërbimeve sekrete) të parlamentit italian.

Antiterrori francez dhe DGSE-ja besojnë se ndër armët e trafikuara nga ky cift ka pistoleta (prodhime sovjetike ose kopje kineze të tyre), automatikë Kallashnikov, kopje kineze mod. 56 me qytë druri të cmontuar si edhe automatikë kallashnikov version sub-kompakt model ASH 82 kopje lokale e automatikut sovjetik. Municionet e trafikuara janë kryesisht të kalibrit 7,62X39 mm dhe 7,62X25 mm.

Kapja e ciftit trafikant dhe lidhjet e tij simbiotike me terroristin tunizian janë jo vetëm një propagandë negative për Shqipërinë dhe shqiptarët, por edhe një këmbanë alarami për porozitetin e kufijve shqiptarë. Shqipëria vend anëtar i NATO-s në vend të të qenit aset dhe të ?eksportimit? të sigurisë po shndërrohet në një liabilitet dhe në një burim telashesh e shqetësimesh për fqinjët, miqtë dhe aleatët tanë. Fatkeqësisht organet ligjzbatuese shqiptare duke filluar nga Ministria e Brendshme e në vazhdim janë shumë të zënë me reformën e drejtësisë për tu marrë me vogëlima të tilla si shndërrimi i shqipërisë në një depo e arsenal për terroistët islamikë në vende të ndryshm, europiane.