Çfarë e bashkon Metën me Kokëdhimën?

9 Korrik 2016, 14:01, Aktualitet CNA

Kreu i LSI-së Ilir Meta dhe ish-deputeti socialist i Vlorës Koço Kokëdhima, sikundër ka raportuar Citynews, kanë intensifikuar takimet dhe bisedat. Lëvizja e Kokëdhimës nga i besuari i Ramës për vite me rradhë, në një nga bashkëpunëtorët e Metës në javët e fundit, nuk është diçka e re.

Referuar fakteve raportet Meta-Kokëdhima kanë qenë miqësore, madje edhe në përplasjen që Kryeparlamentari pati me deputetin Tom Doshi, Kokëdhima është munduar të ulë tensionet dhe dozën e akuzave që ligjvënësi i Shkodrës, i përjashtuar nga Partia Socialiste, kishte ndërmarrë në atë kohë ndaj kreut të LSI-së, pas dyshimeve mbi një atentat të mundshëm ndaj Doshit.

Një tjetër moment kur Meta dhe Kokëdhima janë shfaqur bashkarisht dhe mendohet se është një lidhje mes tyre është inaugurimi i hotelit në Sarandë të vëllezëve Balilaj, ku njëri prej tyre Kelmend Balilaj, rezultoi më pas se ishte ?Eskobari i Ballkanit?. Kelmendi ishte emëruar drejtor në Sarandë me propozim të LSI-së, por është pranuar edhe nga Kokëdhima që për rreth dy vite është cilësuar si Kryeministri i Jugut, për shkak të kompetencave që kishte marrë në komplet rajonin jugor Vlorë-Gjirokastër, jo vetëm në aspektin e strukturave të PS-së, por edhe përsa i takon emërimeve në administratën publike.

Por duket se raportet Kokëdhima-Meta, sidomos pas humbjes së mandatit të deputetit, janë forcuar së tepërmi. Duket se dy politikanët e së majtës tashmë kanë një qëllim, largimin e Edi Ramës nga posti i Kryeministrit. Ky i fundit duket se i ka tradhëtuar dy aleatët e tij përgjatë 3 viteve të mandatit të parë të Qeverisjes.

Ilir Meta në jo pak raste është gjendur nën sulmet e vazhdueshme të sponsorizuara nga aleati i tij kryesor në Qeverisje. Dosja CEZ ishte goditja e parë që iu bë Kryetarit të Kuvendit, ndërsa raportimet e ndryshme që u bënë, nxirrnin se pas sulmit qëndronte dyshja Rama-Gjiknuri. Pasi nuk mundi të dobësonte pozitat e Kreut të LSI-së, një tjetër sulm ndaj tij u dirigjua nga ministri i Brendshëm, ku u duk qartë se qëllimi ishte rrënimi i Metës dhe forcës politike që ai drejton.

Në anën tjetër Koço Kokëdhima nga njeriu i besuar i Edi Ramës, në pak muaj i ndodhur nën presionin e opozitës, por edhe kolegëve të tij të mazhorancës, humbi gjithçka nga pushteti i tij politik. Së pari humbi privilegjin për të qenë i vetmi në oragnizimin e PS-së në rajonin Vlorë-Gjirokastër. Së dyti u detyrua të tërhiqej nga gara për postin e Sekretarit të Përgjithshëm në PS, dhe së treti ngeli i vetëm në betejën për mandatin e deputetit, duke e humbur atë pas vendimit të Kushtetueses.

Ndërsa është e kuptueshme loja e ndjekur nga Rama kundër Metës për shkak të rivalitetit të tyre në qeverisje, por edhe brenda së majtës, mbetet e paqartë sepse Kryeministri brenda pak muajsh, nxorri jashtë loje nga Partia Socialiste, njeriun që e mbështeti për vite me rradhë. Ndoshta kjo lëvizje e Ramës në drejtim të Kokëdhimës u bë për të ruajtur ekujlibrat brenda PS-së, ku mjaft nga deputetët dhe drejtuesit socialist kishin krijuar përplasje me ish-deputetin e Vlorës, apo ky i fundit i shpërfillte ato në çdo drejtim. Por duket se Rama nuk kishte llogaritur ?rrebelimin? e Kokëdhimës, i cili përballë sulmeve nga të gjitha drejtimet, gjeti si zgjidhje një ofrim me Kryetarin e Kuvendit, njëherëz edhe Kryetar të LSI-së.

Tashmë pritet përgjigjia që dy të tradhëtuarit nga Rama të bëjnë lëvijen e rradhës, e cila mund të rezultojë fatale në rrafshin politik për Kryeministrin. Në lëvizjet politike, Meta ka treguar se është një lojtar i fortë, Rama ka treguar se mund të bëjë aleancë me gjithëkënd për të pasur pushtet, ndërsa mbetet mister nëse Kokëdhima do të qëndrojë deri në fund në pozicionin e ri që ka nisur, apo mund të kthehet në një kumbar të një raporti të ri Rama-Meta. /Citynews/