Përplasjet PS-LSI/A po përgatitet Rama të propozojë Nasip Naçon si Kryeprokuror?

9 Korrik 2016, 09:53, Aktualitet CNA

Përplasjet mes Kryeministrit Edi Rama dhe Kryetarit të Kuvendit, Ilir Meta, tashmë janë evidente për shumë nga çështjet, përfshi këtu edhe përbërjen e kabinetit qeveritar.

Në takimin e fundit mes Ramës dhe Metës ku një nga çështjet e diskutuara ishte edhe ajo e ndryshimeve në Qeveri, Kryeparlamentari ka kërkuar largimin e dy ministrave, Sajmir Tahiri dhe Edmond haxhinasto, përkatësisht nga posti i ministrit të Brendshëm dhe ai i Transporteve.

Ndryshimi i vetëm i Qeverisë që ka ndodhur deri më tani ka qenë tërheqja e Nasip Naços nga posti i ministrit të Drejtësisë dhe emërimit në këtë detyrë të Ylli Manjanit.

Kjo lëvizje u konsiderua si një presion i hapur që Meta po i bënte Ramës, por njëherazi edhe si një shkelje marrëveshjeje mes dy drejtuesve të koalicionit qeveritar. Pas zgjedhjeve parlamentare të 2013, ku PS dhe LSI të përfshira në koalicionin Aleanca për Shqipërinë Europiane rezultuan fituese, mes Ramës dhe Metës pati një marrëveshje, sipas të cilës LSI nuk do të përfshinte në kabinetin qeveritar Ylli Manjanin dhe Vangjel Tavon.

Burime nga PS shprehen për Citynews se në atë kohë kushtet e Ramës ndaj Metës, u pranuan nga LSI, por muaj më Kryeparlamentari hodhi hapin e parë duke përfshirë në qeveri, Ylli Manjanin, një nga kritikët më të fortë dhe më të ashpër të Kreut të PS-së, Edi Rama.

Por duket se lëvizja e rradhës i takon Kryeministrit, i cili sipas burimeve të afërta me të, ka piketuar si kandidaturë për postin e Kryeprokurorit pikërisht ish-ministrin e Drejtësisë, Nasip Naço. Ky i fundit mësohet se ka raporte zyrtare me kreun e LSI-së, Ilir Meta, por jo shumë të afërta me të. Duket se Rama po shfrytëzon këtë raport për të bërë një diversion duke piketuar si pasardhës së Adriatik Llallës pikërisht një emër nga LSI.

Nuk dihet nëse Meta do të pranojë një propozim të tillë, por Naço konsiderohet ndër emrat që mund të gjejë mbështetje edhe në rradhët e demokratëve, pasi ka qenë ministër edhe në Qeverinë e drejtuar nga ish-Kryeministri Sali Berisha.

Tashmë mbetet për tu parë nëse Rama do të çojë deri në fund një skenar që mund të vendosë në kushte jo fort të mira partnerin e tij në qeverisje. /citynews/